تعريفة التاكسى تشعل غضب الإسماعيلاوية

 يشهد الشارع الإسماعيلاوى حالة من الغليان والاحتقان الشديدين بسبب أرتفاع تعريفة المواصلات الداخلية مما أضاف عبئا جديدا على كاهلهم الى جانب غلاء أسعار السلع.
 كانت تعريفة المواصلات الداخلية فقط 50 قرشا لاغير وفجأة قرر سائقى سيارات الميكروباص رفعها الى 75 قرشا بنسبة زيادة 50% رغم عدم وجود أى مشاكل فى أسعار وقود السيارات واختفاء السوق السوداء لها الامر الذى أثار غضب الاهالى بمدينة الاسماعيلية.
 ناهيك عن ارتفاع قيمة المواصلات المخصوصة من 3 او 4جنيهات الى 9 و10جنيهات فى المواصلة الواحدة وأمام هذه الازمة اضطر أهالى منطقة التعاون الى التجمهر بعد أن ارتفعت قيمة المواصلة من أى منطقة بالاسماعيلية إليها من 7 الى 10 جنيهات.
 وعلى الفور اجتمع اللواء احمد القصاص محافظ الاسماعيلية بقيادات ادارة المرور وأصدر تعليمات بتغليظ العقوبات وتشديد الرقابة المرورية على سائقى السيارات الاجرة والميكروباصات للوقوف على عدم ارتفاع تعريفة الأجرة من قبل مجموعة السائقين.
 وفى غضون ذلك تبنت بعض الصفحات على موقع التواصل الاجتماعى فيسبوك الخاصة بمدينة الاسماعيلية دعوة المواطنين لتنظيم وقفة احتجاجية ضد جشع السائقين ومطالبة الجهات المسئولة لمواجهة اسغلال سائقى اجرة الاسماعيلية، للمواطنين وايجاد حلول لهذه الازمة
 وجاءت التعليقات على تلك الصفحات تحمل فى طياتها افكارا نحو حلول لتلك الازمة المتفاقمة يوما يتلو الاخر، فعلى سبيل المثال من قال (بالنسبة لموضوع رفع سعر الاجرة فى بعض خطوط النقل الداخلى فى الاسماعيلية والمستقبل ... بسيطة جدا مادام الموضوع بقى استغلال والربع والنص جنيه بيفرق مع ناس غلابة كتير اوى خصوصا اللى من الضواحى ... احنا ممكن نعمل حملة هنا ان كل واحد يلاقى حد بيستغل الناس ممكن ننزل رقم السيارة هنا ونحاول نرتب الموضوع .. لعل وعسى حد من الاجهزة الرقابيه يشوف الموضوع وياخد اجراءات .. ايه رأيكم؟، الاسهل اننا نعمل يفط ارشادية باسعار المواصلات ونعلقها فى الاماكن اللى الناس واقفة فيها كدة التوعية تبقى للناس كلها، المقاطعة هية اللى هى هتجيب نتيجة والمطالبة بفتح باب التراخيص، يوصلنى لاخر الشارع وياخد منى 5 جنيهات ليه يعنى حرام والله ؟؟، يا جماعه والله الكلام ده من رئيس مباحث المرور لما نلاقى حد مغلى اﻻجره ناخد رقمه ونوديه لمباحث المرور وهما بيجيبوه ويدفع غرامه 300 جنيه بس للاسف الناس بتخاف وتقولك انا اروح واعمل واسوى ﻻ ﻻزم نقف بجد ضد اﻻستغلال وانا مستعد اساعد بأى حاجه، احنا ممكن ناخد رقم العربية لو غلى الاجرة ونكتبها ع الصفحة هنا والادمن او اى حد يحب يساعد ياخد الارقام دية ويوديها للمرور.. بس يبقى فيه تنسيق) كل هذا واكثر من افكار يطرحها الشارع الاسماعيلى للحد من هذه الازمة التى باتت تتفاقم يوما بعد يوم.
 من جانبه اكد احمد اليمانى المتحدث الاعلامى لمحافظة الاسماعيلية على ضرورة اهتمام وتحرك كل مواطن على ارض الاسماعيلية للصالح العام ففى حالة اثبات اى تجاوز او ارتفاع فى اسعار الاجرة يتم التوجه الى ادارة المرور للابلاغ عن الواقعة والقضاء على هذه الظاهرة التى تفشت بين سائقى الاجرة وكل من تسول له نفسه للعبث بامن المواطن المادى من سائقين وبائعين وتجار، هنا يردد اليمانى انه «ما ضاع حق وراءه مطالب».
 أشار اليمانى الى انه وفقا لقرار السيد اللواء احمد القصاص محافظ الاسماعيلية بتغليظ العقوبات على السائقين وتشديد الرقابة المرورية فانه قد تقرر منع اى ارتفاع او زيادة فى اسعار الاجرة وذلك بالتنسيق والتعاون مع مركز ومدينة الاسماعيلية، ادارة المرور ومشروع النقل الداخلى لاحكام الرقابة على اسعار الاجرة بالإسماعيلية.