نشطاء مصر لـ «الجزيرة إخوان»: القطرى على دين كفيله

 كتبت - مروة مظلوم

تواصل قناة الجزيرة لعبتها فى الحذف والإضافة وترتيب وتنميق كل مايخدم المصلحة القطرية وعلاقتها بجماعة الإخوان الدولية فاستحقت عن جدارة لقبها بـ«الجزيرة إخوان».. حيث تنشر مجموعة من الأخبار المتضاربة وتعود لتكمل مسيرتها بالمزيد من الأخبار دون نفى أو إثبات حقيقة ماتبثه الشبكة القطرية فأذاعت خبر وفاة السيسى واغتياله 4 مرات على لسان ضيوفها من أنصار المعزول الذين أكدوا أن من يطل علينا ماهو إلا دوبلير لوزير الدفاع ثم عادت لتبث خبر ترشحه للانتخابات الرئاسية.. وتنوعت ردود أفعال النشطاء على مواقع التواصل الاجتماعى فيس بوك مستشهدين بمواقفها الغريبة وكانت تعليقاتهم على النحو التالى:
 
الجزيرة بتذيع خبر ترشيح السيسى للرئاسة مع انها ذاعت قبل كده خبر وفاته وقتله اربع مرات .. يا مثبت العقل و الدين يا رب.
اصل اللى هيترشح ده الدوبلير مش السيسى الحقيقى اخوان ستايل
شوية وهتقولك مرسى فى قصر الرياسة وان مبارك مات برصاصة من بلطجية السيسى
أمير قطر وشعبه فى وادى ووزير خارجيته فى مستنقع إخوان الشياطين فهل للوزير سلطة وسطوة أقوى من الشعب واﻷمير ؟ السر فى بير اسمه قناة الجزيرة
بيفتح الجزيرة: إخوان بيموتو.
بيفتح أون تى في: ضباط شرطة بيموتوا
بيفتح MBC 3: عمو سكار بيموت موفاسا
بيفتح التلاجة: بيموت من الجوع
لقمة العيش صعبة.. ماهو مش معقول ولا من باب الصدفة كل مذيعى قناة الجزيرة إخوان ..الناس على دين (كفيلهم)
على فكرة الجزيرة حيادية لانها مقالتش ان ده رأيها وبالعكس عرضت الرأى والرأى المعاكس والخبر والخبر المعاكس، الدور والباقى على النوابغ اللى عندنا ومسمينهم إعلاميين.
دة الدوبلير دة طلع جبروت اوى كمان عايز يترشح للرئاسة.