الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

فى ذكرى شاعر العامية




قصائد - بيرم التونسى .. رسوم - لورنس الماتديما

شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بالشاعر الكبير الراحل بيرم التونسى والذى توفى فى 5 يناير 1961، وهو شاعر مصرى من أصول تونسية، ويعدّ من أشهر شعراء العامية المصرية، قدّم بيرم أعمالاً أدبية مشهورة، وقد كان أغلبها أعمالاً إذاعية منها سيرة الظاهر بيبرس وعزيزة ويونس، غنّت له أم كلثوم عدة قصائد مما ساعد على انتشاره فى جميع الأقطار العربية، كما غنى له فريد الأطرش العديد من القصائد.
يصاحب القصائد لوحات الفنان الريطانى العالمى لورنس إلما تديما والذى يعد أحد أهم الرسامين المعروفين بالقرن الثامن عشر، وفى 8 يناير عام 1912 توفى تديما عن عمر يناهز الـ 76 عاماً.
 

 
الورد جميل

الورد جميل .. جميل الورد
الورد جميل وله اوراق
عليها دليل من الاشواق
اذا اهداه حبيب لحبيب
يكون معناه وصاله قريب ..
شوف الزهور واتعلم
 بين الحابيب نتكلم
شوف شوف
 شوف الزهور .. واتعلم
والنرجس مال .. يمين وشمال
على الاغصان بتيه ودلال
عيونه تقول معانا عذول
خلينا بعيد عن العزال
شوف الزهور واتعلم
 بين الحابيب نتكلم
شوف شوف
 شوف الزهور .. واتعلم
يا فل يا روح يا روح الروح
من شم هواك عمره ما ينساك
لكل حبيب تقول بلغاك
حبيب مشتاق بيستناك
شوف الزهور واتعلم
بين الحابيب نتكلم
شوف شوف
 شوف الزهور .. واتعلم
شوفوا الياسمين جميل نعسان
حلى له النوم على الاغصان
بكل حنان تضمه الايد
وبه تزدان صدور الغيد
شوف الزهور واتعلم
بين الحابيب نتكلم
شوف شوف
 شوف الزهور .. واتعلم
 

 
غنى لى شوية شوية


غنّى لى شوية شوية ....غنّى لى وخد عينيّ
خلينى أقول ألحان ...تتمايل لها السامعين
وترفرف لها الأغصان ....النرجس مع الياسمين
وتسافر بها الركبان ...طاويين المواكب طيّ
شوى شوى ...شوى شوى
المغنى حياة الروح ....يسمعها العليل تشفيه
وتداوى كبد مجروح ....تحتار الأطبّة فيه
وتخلى ظلام اللّيل ....فى عيون الحبايب ضيّ
شوى شوى ...شوى شوى
لأغنّى واقول للطير ...من بدرى صباح الخير
والقمرى مع الخضّير ...ويّاى يردّو عليّ
شوى شوى ....شوى شوى
أحلفلك ..بربّ البيت ......يا مصدّق بربّ البيت
لاسحركم إذا غنّيت .....وارقّص بنات الحيّ
شوى شوى ....شوى شوى
لأغنى واغنى واغنى .... واورى الخلايق فنى
والإنسى يقول للجنى .... والرايح يقول للجاى
المغنى حياة الروح ....يسمعها العليل تشفيه
وتداوى كبد مجروح ....تحتار الأطبّة فيه
وتخللى ظلام اللّيل ....فى عيون الحبايب ضيّ
شوى شوى ....شوى شوى
 
أنا فى انتظارك
 
أنا فى انتظارك خليت
نارى فى ضلوعى وحطيت
إيدى على خدى وعديت
بالثانية غيابك ولا جيت
ياريت ياريت ياريت
يا ريتنى عمرى ما حبيت
عايز أعرف لا تكون غضبان
أو شاغل قلبك انسان
خليتنى من يأسى أقول
الغيبة دى غيبة على طول
واتفكر إيه اللى جنيت
من ذنب يسيئك ما لقيت
ياريت ياريت ياريت ياريت
يا ريتنى عمرى ما حبيت
اتقلب على جمر النار
واتشرد ويا الأفكار
النسمة أحسبها خطاك
والهمسة أحسبها لغاك
على كده أصبحت وأمسيت
وشافونى وقالوا اتجنيت
ياريت ياريت ياريت ياريت
يا ريتنى عمرى ما حبيت
توعدنى بسنين وايام
وتجينى بحجج وكلام
وتسلم وتمر قوام
او تخلف وتقول لى نسيت
ياريت ياريت ياريت ياريت
يا ريتنى عمرى ما حبيت
 

 
هلت ليالى حلوة


هلت ليالى حلوة وهنية.. ليالى رايحة وليالى جاية
فيها التجلى دايمً تملى.. ونورها ساطع من العلالى
هلت ليالى.. هلت ليالى
ليالى حلوة نشتاق اليها.. وفيها ليلة الله عليها
القدر فيها الله وأكبر.. أوعدنا بيها الله واكبر
ويا رب توبة والعمر نوبة.. وتكون قريبه تسعد أمالى
هلت ليالى.. هلت ليالى
فى كل لحظة اقول يا ربى.. انت اللى اسمك يسر قلبى
على جمالك الله اكبر.. على جلالك الله اكبر
كل التمنى لو ترضى عنى.. واعيش مهنى ولا أبالى
هلت ليالى.. هلت ليالى
 
الهوى غلاب


هو صحيح الهوى غلاب ؟ .. ما عرفش انا
والهجر قالوا مرار وعذاب واليوم بسنة
جانى الهوى من غير مواعيد وكل مادا حلاوته تزيد
ما أحسبش يوم ح ياخذنى بعيد
يمنى قلبى بالأفراح
وارجع وقلبى كله جراح
إزاى يا ترى ؟
أهو ده اللى جرى !
وانا ما عرفش
نظره وكنت أحسبها سلام وتمر قوام !
أتارى فيها وعود وعهود .. وصدود وآلام!
وعود لاتصدق ولا تنصان
عهود مع اللى مالوش أمان
صبر على ذله وحرمان
وبدال ما اقول حرمت خلاص
أقول يارب زدنى كمان
إزاى يا ترى ؟
أهوه ده اللى جرى !
وانا ما عرفش
يا قلبى آه
الحب آه
أشجان والم
واندم واتوب
وعلى المكتوب
ما يفدش ندم
يا ريت أنا أقدر أختار
ولا كنت اعيش بين جنة ونار
نهارى ليل وليلى نهار
أهل الهوى وصفوا لى دواه
لقيت دواه زود فى أساه
إزاى يا ترى ؟
أهو ده اللى جرى !
وانا ما عرفش
 

 

بالسلام احنا بدينا
 

بالسلام احنا بدينا .. بالسلام
ردت الدنيا علينا .. بالسلام
ياسلام .. ياسلام .. ياسلام .. ياسلام
بالسلام .. بالمحبه .. الدنيا تحيا
ليه يكونوا ناس فى ناحيه .. وناس فى ناحيه
مهما كنا .. ومهما كنتم .. من حقوقنا .. احنا وانتم
الحياة .. والسلام ..
ياسلام .. ياسلام
للحبايب .. احنا مدينا الايادي
رحبت بينا الامم من كل وادي
تحيا فى النور .. كل امه .. والحقيقه نشوفها لما
نبتعد عن الظلام .. بالسلام
ياسلام .. ياسلام
السلام كلمة وحده يا جمالها
ياسلام لما قام (جمال) وقالها
جوهرة بالدنيا كانت .. مستخبيه وبانت
بالسلام .. بالسلام
ياسلام .. ياسلام شوف الحكاية


شوف الحكاية يا ولد شوف الحكاية

عشق الصبايا يا ولد طوّل معايَ
منهم هنايا يا ولد منهم أسايا
وهما جرحى ياولد وهما دوايَ
زرع الوداد على غير ميعاد بقى شغلتى
أزرع وأبيع قبل الربيع من جنتى
وأحلف ما أتوب وان شاء الله أتوب فى محبتى
دا الصبر طيب يا ولد صبرك معاى
حبيت سواد العين سنة ونسيت صباحى
وغرقت فى ليل الضنى عطشان وصاحى
ولما بان ورد الشفايف لون جراحى
طاوعت قلبى ورحت له والشوق ورايَ
لو الأخ اللى بأتوى فيه يصبح مراعى
لأطوى المداين على القدم وأمشى له ساعى
وأفرد قلوعى يا ولد وأركب شراعى
أنا وحبيبى فى الهوى على هوايَ
 

 
أهل الهوى


أهل الهوى يا ليل فاتوا مضاجعهم
واتجمعوا يا ليل صحبه وأنا معهم
يطـولوك يا ليل من اللى عالم بيهم
وأنت يا ليل بس اللى عالم بيهم
فيهـم كسير القلب
و المتألـــــــم واللى كتم شكواه
و لم يتكلـــــم
واللى قعد بعد الحبايب وحــده
وبات حزين بشكى هيامه ووجده
يشكوا ولا مخلوق سمع شكواهـــم
إلا الكواكب فى السماء سمعاهـــم
يطولوك يا ليل بالسهد والأفكــــــار
والشمس بعد الليل تطلع عليهـــم نور نور
وبعد طول الويــل تطلع لهم يا ليل
ويقصروك يا ليل فى صحبه هنيــه
علــى وتـــر رنــــان للصبحيــة
فيهم يا ليل خل عطف خلــــــه
ويقول له لحن الشوق وخله ويقول
يا ليل .. .يا ليل ... ياليل ... ياليل
ويقصروك ياليل على هنا وسـرور
والشمس بعد الليل تطلع عليهم نار نار
ويسألوك يا ليــل أمتى تعود يا ليل
ناس من قلوبها تقول يا ليـــــل
وناس على الأرغول تقول يا ليـــل
واحنا معانا بـــدر طالع فى ليلة قدر
فيها حبيب القلـب وافا و وافا الندر
هو يقول يا ليل واحنا نقول يا ليـل
وكلنــا بنقـول يا ليــــل يا ليـــل


أحبابنا يا عين


أحبابنا يا عين ما هم معانا
رحنا وراحوا عنا  ما حد منا اتهنى
عين يا عينى
أحبابنا بالروح جاروا علينا
يا هل ترى فى بالهم ولا نسيونا
رحنا وراحوا عنا  ما حد منا إتهنى
عين يا عينى
فى كل يوم يزيد شوقى إليهم
روح يا نسيم بالله سلم عليهم
نفسى أشوفهم مرة دى الفرقة صعبة ومرة
عين يا عينى