إبداع

شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع للاحتفال بالشاعر الكبير الراحل بيرم التونسى (مارس 1893 - 1961) شاعر مصري، ذو أصول تونسية، ويُعد من أشهر شعراء العامية المصرية، تغنى بقصائده الكثير من المغنين منهم  أم كلثوم، فريد الأطرش، أسمهان، محمد الكحلاوي، شادية، نور الهدى، محمد فوزي، كما قدم العديد من الأعمال الإذاعية.
يصاحب قصائد التونسى لوحات الفنان الايطالي العالمي بوتشيلي، 1445-1510 هو رسام إيطالي من عصر النهضة، أغلب لوحاته تناولت المواضيع الدينية أو الميثولوجية: كالربيع، مولد فينوس.
 

الشرق
 
من قبل ما اكتب أنا عارف القول ضايع
و الأجر بالتأكيد ذاهب حسب الشايع
و الشتم حايجينى مسوجر من واد صايع
مهما انكويت بالنار والزيت برضك فنان
يا مصرى وانت اللى هاممنى من دون الكل
هزيل ويحسبك الجاهل عيان بالسل
من دى الكيوف اللى تصبر على كتر الذل
و نمت والعالم فايق قوم بص وطل
و شوف الشعوب واتغص ودوب وارجع إنسان
و اللى آلمنى وبكانى انت يا شامي
ع الأكل نازل طول عمرك بارد حامي
و قلت لى لما نهيتك مصرى حرامي
لحد ما الجزار خلا جرحك دامي
و الله الخروف سايب معلوف ما يفوته جعان
و المغربى المسلم راخر أبو زر فاشوك
لما انتقدته فزع قاللى يلعن ... بوك
و نا اللى قصدى أشوف قيده يصبح مفكوك
لقيته فرحان به راضى طيب مبروك
خليك فقير دق البندير وكل التعبان
روح للعراق راخر قول له كيف الأحوال
لإمتى تفضل يا أخينا بحرام وعقال
ما تعرف الجاز يستعمل غير للمشعال
الطم بقى وقول ويايه الجاز أموال
و اوعى المداس يفلت تحتاس وتقول لى أمان
يا شرق فيك جو منور والفكر ضلام
و فيك حرارة يا خسارة وبرود أجسام
فيك سبعميت مليون زلمة لكن أغنام
لا بالمسيح عرفوا مقامهم ولا بالإسلام
هى الشموس بتخلى الروس كداهو بدنجان
 
 
التغريبة
 
غلبت اقطع تذاكر
وشبعت يارب غربة
بين الشوط والبواخر
ومن بلادنا لأوروبا
وقلت على الشام أسافر
إياك ألاقيلى ترية
فيها أجاور معاوية
وأصبح حماية أمية
جاورت «قاسيون» وجيرته
توحش ولا فيهش حاجة
وعزرائين انتظرته مجاش
وجانى الخواجة
نافخ وسايق امارته
وقاللى / شوف السماجة
البر تحت انتبدبنا اخرج
دى ماهيش وسية
رجعت للبحر تانى مقهور
وراجع فرنسا
فى بقى طعم البوداني
فاكره وأنا عمرى ما
أنسي
وإن رحت تونس كفاني
عذاب أنا والتوانسة
«جملان» محضر مدافن
للأمة .. والأمة حية
فى بورسعيد السفينة
رست تفرغ وتملأ
والبياعين حوطونا بكارت
بوستال وعملة
لكن بوليس المدينة متفوتش
من جانبه نملة
يا بورسعيد والله حسرة
ولسه يا اسكندرية
هتفلى هاتف وقال لي
انزل ومن غير عزومة
انزل ده ساعة تجلى
فيها الشياطين فى نومه
انزل ده ديك تملى
فوقك وفوق الحكومة
نطيت فى ستر المهيمن
للشط يا حكمدارية
وأقول لكم بالصراحة فى قليلة
عشرين سنة فى السياحة
بشوف مناظر جميلة
ما شوفت يا قلبى راحة
فى دى السنين الطويلة
إلا لما شفت البراقع
واللبدة والجلابية
 

 
أنا فى إنتظارك
 
انا فى انتظارك خليت نارى فى ضلوعى وحطيت
ايدى على خدى وعديت
بالثانيه غيابك ولا جيت
ياريتنى عمرى ماحبيت
عايز اعرف لا تكون غضبان
او شاغل قلبك انسان
خليتنى من يأسى اقول الغيبه دى تغيب على طول
واتفكر ايه اللى جنيت من ذنبى يسيئك مالاقيت
ياريت  ياريت
اتقلب على جمر النار واتشرد ويا الافكار
النسمه احسبها خطاك والهمسه احسبها لقاك
على كده اصبحت وامسيت
وشافونى وقالوا اتجنيت
ياريتنى عمرى ماحبيت
تواعدنى بسنين وايام وتجيبنى بحجج وكلام
وتسلم وتمر قوام او تخلف وتقول لى نسيت
ياريتنى عمرى ماحبيت
 
 
صدفه
 
إزاى زمان النور والحرية
صادف زمان القنبلة الذرية
يا هل ترى صدفه كده طبيعية
و لا الصدف تخفى فى حكم إلهيه
شوف لما كنا زمان الحشمة
كان ربنا ناظر لنا بالرحمه
و لما أصبحنا مجرد لحمة
اللحمة يلزمها تبات مشوية
سكتت على المنكلا قسس ومشايخ
و اللى بيوعظ زى حالى
رايح واحدة والنبى إنك بايخ
و التانيه قالت يبتليك برزيه !
 

 
 
ياورد استنظرك
 
يا ورد استنظرك قبل الربيع بربيع
و اوهب لك العمر
و اجعل لاهل الملامة فى هواى شفيع
أوراقك الحمر
دى رقتك علمتنى أبقى عبد مطيع
للبيض والسمر
و اوهب لك العمر ياللى عمرك انت قصير
و بقصر الهم
أوراقك الحمر تشرب دم قلبى عصير
يا اغلى من الدم
للبيض والسمر تهدى وانت حر أسير
تنباس وتنضم
و بقصر الهم زوالك ونت لسه جاي
فى عالم الغيب
يا اغلى من الدم لونك فى عروق الحي
حتى مع الشيب
تنباس وتنضم قدام الرقيب فى الضي
ما فيكش من عيب
 
 
المركب
 
يا موج البحر يا رايق واصل منين وفين سايق
اروح شرقى تتابعنى واروح غربى تطاوعني
وانا فى الروحة والجاية
بفكر فى حبيب ليه
احبايا اللى زاد شوقى اليهم نسونى قد ما فكرت فيهم
أمانة يا نسيهم سلم عليهم
ولاطفهم ولاغيهم وفكرهم وعابثهم
على قلة مكاتبهم
 

 
 
هو صحيح الهوى غلاب
 
هو صحيح الهوى غلاب .... ما عرفش انا
والهجر قالوا مرار وعذاب واليوم بسنة
جاني الهوى من غير مواعيد وكل مدى حلاوته تزيد
ما احسبش يوم حياخدني بعيد
يمنّي قلبي بالأفراح … وارجع وقلبي كله جراح
إزاي يا ترى ..اهو ده الي جرى.. وانا .. وانا معرفش
نظرة وكنت احسبها سلام وتمر قوام
اتاري فيها وعود وصدود وآلام
وعود لا تصدق ولا تنصان
عهود مع الي ما لهش امان
و صابر على ذلة وحرمان
وبدال ما اقول حرمت خلاص خلاص
اقول يا ربي زيدني كمان
ازاي يا ترى
اهو ده اللي جرى
وانا انا معرفش
يا قلبي آه... الحب وراه ...
اشجان وألم .. واندم واتوب ...
وعلى المكتوب ما يفيدش ندم
يا ريت انا اقدر اختار
ولا كنت اعيش بين جنة ونار
نهاري ليل وليلي نهار
أهل الهوى وصفولي ... وصفولي دواه
لقيت دواه زود في أساه ..
ازاي يا ترى
اهو ده اللي جرى
وانا انا ماعرفش
 
 
عتاب
 
ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!
ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم
من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم
ليه تهدمونى وناللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الاسيّه وانا راحل وسايبكم؟
 
 



 
دوسيهات الدواوين

 
فى دى الدوسيهات أشغالك وأشـــــــغالي
بقى لها خمسين سنة فى وضعها الحالي
فيها معاش أرملة قالــــــت يابو عيـــــــالي
وعرضحــــــال شاب بائس م العمـــل خالي
و مشكلة وقف فاتها خورشــــــــــيد الوالي
حاططها صاحبـــــــــك وبيقول لك ونا مالي
دا حسنى بيه المديــــــــر العام باعتها لي
و لسه عايزالها إمضة مستشــــــــار عالي
و لا حاتنزل على الأرشيـــــــــــــف طوالي
أدى النظـــــام اللى خارب بيــــــــت مالي
و مركــــــب الفقر أمثــــــالك وأمثــــــــالي