الخميس 28 مارس 2024
رئيس مجلس الإدارة
هبة صادق
رئيس التحرير
احمد باشا

فيلم الموسم وكل موسم.. العرض مستمر طوال فترة الرئاسة الأولي ولمدة 4 سنوات















 
 
فيلم الموسم وكل موسم.. العرض مستمر طوال فترة الرئاسة الأولي ولمدة 4 سنوات مؤسسة الرئاسة تقدم لكم العرض الأول

للفيلم الروائي الطويل
 
«أمريكان في القصر الجمهوري»
 

 
المشهد الأول «نهار/ خارجي»
- سيارة مسرعة آخر موديل تجري في شوارع القاهرة بسرعة جنونية بداخلها اثنان من أبناء الرئيس المحتمل.. السيارة تصطدم بسيارة أخري تسير أمامها.. السيارتان تتوقفان لعطل في الأولي وتلفيات شديدة نتيجة الصدمة.. ضابط مرور ومعه أمين شرطة يحاولان أن يحررا محضراً بالحادث.. ينزل ابنا الرئيس المحتمل.. ويدور الحوار التالي:
الضابط - رخصك لو سمحت يا أستاذ؟
الابن الأول - رخص إيه انت مش عارف انت بتكلم مين؟!
- الضابط هتكون مين يعني.. وبعدين أنا بطلب الرخص.. وده حقي.
الابن الثاني - حقك ازاي.. انت مش واخد بالك إحنا مين ولا إيه؟!
أمين الشرطة - يا عم هات الرخص وخلصنا انتم ح تحققوا معانا.
الابن الأول - أنا يتقال لي «يا عم» كده وش من غير سيادتك.. ومن غير من فضلك ولا إذا سمحت يا أفندم.
الضابط - هو فيه إيه.. انتم مين.
الابن الثاني - أولاً إحنا أولاد الرئيس القادم.. فاهم يعني إيه الرئيس القادم.
الضابط - لأ.. مش فاهم فهمهاني ده.
الابن الأول - يعني إحنا كده أبناء رئيس جمهورية مصر العربية فهمتها.
الأمين - آه.. ده علي اعتبار إن أبوكم نجح فعلاً!!
الابن الثاني - لأ.. ده هو ناجح ناجح.. من غير لو!!
الضابط - طيب دي أولاً.. وثانياً؟
الابن الأول - وثانياً انتم بتكلموا مواطنين أمريكيين.. إحنا معانا الجنسية الأمريكية.. يعني ح نطلب السفيرة الأمريكية تيجي هنا علشان تربيكم وتوقفكم عند حدكم.. مصري بحجم خرسيس.. مرسيس.. فلوش.. واستيوبت.
الأمين - ده رطن باللاوندي أهو.. ابن.. الرئيس القادم.
الابن الأول - انت بتبرطم بتقول إيه يا ابن الـ.............. «سب وقذف حذف بمعرفة الرقابة».
الضابط - لأ.. كده انت بتغلط ولازم نعمل محضر.. ولازم تيجي معايا القسم.. ولابد من إبراز الرخص وتحقيق الشخصية.
الابن الثاني - مالك واثق من نفسك قوي كده.. تحب اعزلك من الرتب وارفدك من الخدمة.. واشردلك عيالك.
الابن - يابني احفظ لسانك أنت بتغلط كده في حضرة الضابط أثناء تأدية وظيفته.
الابن الأول - أنا أحفظ لساني يا ابن الـ............ طيب خد.. دب.. دب.. دب.
الولدان يضربان الأمين بالبوكس والشلاليت.. طاخ.. طاخ.. حتي يتدخل الضابط ويفض الاشتباك ويصمم علي أن يأخدهما للقسم لعمل محضر.. في البداية يمتنعان ويواصلان سب الضابط والأمين.. يتجمهر الناس والموضوع يكبر.. وفي النهاية تحت إلحاح الجماهير.. يرضخان ويذهبان للقسم.
المشهد الثاني «نهار / داخلي»
غرفة المأمور.. والضابط والأمين وأولاد الرئيس القادم أو المحتمل.. وبعض الشهود
المأمور- مين دول.. وفيه إيه يا حضرة الضابط ومين اللي بهدلكم كده البهدلة السودة اللي انتم فيها دي.
الابن الأول- إحنا يا أنكل.
المأمور - أنكل مين يالاه.. ما تتكلم عدل.. مين دول يا حضرة الضابط.
الضابط - دول يا افندي تعدوا علينا.. علشان طلبنا منهم الرخص.. وبيقولوا أنهم أولاد رئيس الجمهورية.
المأمور: يا ابني مش ولاد الرئيس في سجن المزرعة.. هو إحنا ناقصين افتري.. مش كفاية اللي شفناه من الأستاذ جمال والأستاذ علاء.. انتم مين يابني.. انت وهو.
الابن الثاني - ابنك.. يظهر أنك مش عارف انت بتكلم مين؟!
المأمور - يعني ح أكون بكلم مين يعني.. ابن بارم ديله.. بطايقكم فين انت وهو.
الولدان يلقيان جوازات سفرهما الأمريكية بغطرسة ويجلسان ويضعان «رجل علي رجل».
الابن الأول - أطلب لنا السفير الأمريكي واطلب لنا اثنين حاجة ساقعة.. وشغل التكييف أحسن اتخنقنا.
المأمور - ما عندناش تكييف هنا.. وبعدين أنا مش طالب حد.. أنا ح أحطكم في الحجز لغاية ما تتعرضوا علي النيابة بكرة.
الابن الثاني - ما بلاش النيابة لا تيجي بكرة ما تلاقيش مكتبك ولا القسم نفسه اللي انت شغال فيه!
المأمور - ليه إن شاء الله.. ح تلبسوه طاقية الإخفاء.
الابن  الأول - لأ.. طائرات إف 16 ممكن تيجي تقصف القسم باللي فيه.. أو الأسطول الأمريكي يبعت لكم صاروخ موجه يشيلكم كلكم من علي وش الأرض.
المأمور - ما شاء الله.. بمناسبة إيه بقي؟
الابن الثاني - وبعدين بكرة ح تلاقيني في قصر عابدين أو القصر الجمهوري أو قصر المنتزه أو في استراحة شرم الشيخ أو في قصر العروبة يعني.. شوف ساعتها هعمل فيك إيه.
المأمور - «منفعلاً» يعني ح تعمل إيه؟
الابن الأول - أنا ممكن أعزلك.. أو أرجعك عسكري.. بدل النسر والسيفين دول.. أحط لك علي كتفك فرخة مدبوحة.. فاهم يا سيادة اللوا.. فوق إحنا الأمريكان اللي ح نعيش في القصر الجمهوري بتاع بابي.. فاهم.
المأمور - بشرفي لا أبيتكم في الحجز لغاية ما النيابة تيجي تعرف شغلها معاكم.
«الابنان يتصلان بالموبايل ويتحدثان بالإنجليزية.. وجرس التليفون علي مكتب المأمور يرن بصوت يزعج»
المأمور - ألو.. أيوه يا فندم.. نعم.. إيه.. حاضر يا فندم.. حاضر.. حاضر.. مفهوم طبعاً.. أوامر سعادتك يا فندم.
التليفون يرن مرة أخري.. المأمور يلتقط السماعة بسرعة
المأمور - ألو.. yes.. yes.. yes  ok.. ok
المأمور يضع السماعة ويوجه كلامه للضابط والأمين
خرجهم يابني خليهم يروحوا
الضابط - يا فندم لا يمكن ده يحصل
الأمين - علي جثتي يا فندم ده أنا أضربت ووشي اتخرشم.
المأمور - يا أفندية المكالمة الأولي كانت من وزير الداخلية.. الثانية بقي كانت من باراك أوباما.. وإحنا مش عايزين مشاكل مع حد.. لإنه هددني لو الولاد مروحوش دلوقتي وباتوا في حضن مامتهم ح يبعت نتانياهو يطربق علينا القسم.. أو يبعت قوات حلف «الناتو» يهاجمونا بالصواريخ.
يدخل عسكري.. ومعه محامي
المحامي - وبالإضافة بقي لوزير الداخلية وباراك أوباما.. أنا معايا جاي أعمل محضر للأمين والضابط بأنهم تحرشوا بأهل منزل الرئيس القادم.. إيه رأيك بقي.
المأمور - يا عم أنا قلتكم من الأول الولاد يروحوا يناموا في حضن السيدة الأولي يا دار ما دخلك شر.. إحنا خلصنا من جمال وعلاء.. طلعلنا مش عارف مين ومين.. إلا اسم النبي حارسهم إيه؟!
«النهاية»
 
 


■ الصبر نوعان:
- صبر علي ما تكره..
- وصبر علي ما تحب..
 
■ والانتخابات نوعان:
- نوع نحبه إذا ما نجحنا وحققنا المركز الأول
- ونوع نكرهه إذا ما خاننا الحظ وحقننا المركز الثالث والرابع!!
 
■ والتصريحات نوعان:
- نوع قبل الانتخابات الرئاسية.. جميل وحلو وملون
- ونوع بعد الانتخابات فظيع وزفت وأبيض وأسود
 
 

 
مساااااااء الفل
 
 
■ الإخوان أسيادكم!!
- النائب الإخواني محمد عماد الدين عضو الهيئة البرلمانية لحزب الحرية والعدالة صرح في برنامج «ناس بوك» علي قناة روتانا المصرية رداً علي هجوم صلاح عناني علي الإخوان المسلمين: «الإخوان أسيادكم»!!
- فرد عليه رئيس الهيئة البرلمانية لحزب الحرية والعدالة: «الحزب بريء منك إلي يوم الدين يا عكرمة».
- فردت عليهما جبهة ائتلاف «الأسياد» بالدعوة لمليونية جديدة.. لمعرفة من أسياد المصريين.. الإخوان.. أم السلفيين.. لأن أسيادنا كتروا في الآونة الأخيرة.
 
■ الإخوان سيعلقون المشانق لنا!!
- صرح عبدالرحيم الغول نائب الوطني في صعيد مصر قائلاً في مؤتمر شعبي:
سنقف خلف شفيق وندعمه.. لأن الإخوان يسعون للانفراد بالساحة السياسية.. وإقصاء الجميع وطالب جميع القبائل في الصعيد بحماية الصناديق من هيمنة الإخوان.. لأنهم سوف يعلقون لنا المشانق إذا وصلوا للحكم وسوف يندم الشعب المصري بعدها ندماً كبيراً.
- وصرح عم فتحي النجار أنه حتي الآن قام بعمل سبعة ملايين واتنين وتسعين مشنقة هو وفريق العمل الذي يعمل معه ليلاً.. ونهاراً.
- أما المسئول عن توريد المشانق للحزب فقد قرر أن يستورد باقي المشانق من دنشواي وتحت إشراف اللورد كرومر.. المندوب السامي البريطاني، أما إذا عجز عم فتحي واللورد كرومر عن الالتزام بتوريد الطلبية في موعدها.. فسيأمر الحزب بالتعاقد علي استيراد باقي الكمية من الصين.
 
■ الإخوان خائفون من توفيق عكاشة!!
- تم استدعاء وزير الإعلام أحمد أنيس للمثول أمام منصة الدكتور سعد الكتاتني الذي اعتبر أن المجلس ورئيسه يتعرضون لهجمة شرسة لنشر الأكاذيب واختلاق الافتراءات علي الإخوان المسلمين.. وأن هذا ليس فيه من الإعلام أي شيء.. وهذه ليست حرية صحافة!! وهاجم مجموعة من النواب الوزير وهاجموا بشدة عدة قنوات.. واختصوا توفيق عكاشة صاحب قناة الفراعين بنصيب الأسد من الهجوم.. واتهموه بنشر الافتراءات عن التيار الإسلامي.. وهاجموا قناة «التت» التي دأبت علي تقديم الرقص الشرقي.
ورغم أن من تولي الهجوم معظمهم من حزب «الحرية والعدالة».. إلا أنهم كانوا ضد «حرية الإعلام».. وضد «عدالة» توزيع الاتهامات فقنوات التيار الإسلامي تسب جميع الاتجاهات الأخري بدءاً من المواطنين.. ومروراً بالخصوم السياسية ونهاية بالمجلس العسكري.
- وزير الإعلام رد عليهم قائلاً: نحن في عصر الحرية بفضل ثورة 25 يناير.. وقنوات الحكومة الرسمية لا تهاجم أحداً.. والقنوات الخاصة حسابها عند هيئة الاستثمار.. صاحبة منح الامتياز بالبث.
- وهاجم بعض النواب قناة الرقص الشرقي «التت» لأنها تتسبب في تخلف بعض الأعضاء عن حضور الجلسات لتفرغهم لمتابعة الراقصة «سما».. وغيرها من الراقصات.. التي يرغب البعض في الزواج منهن لاستتابتهن وهذا عمل إنساني ووطني.
 
 

عملوا لنا البحر طحينة
 
حيرني ومَرَّرني
وشنكلني في حباله
ودوخني ودحرجني
وشغلني بخياله
وأكلني الأونطة
لما فتح لي الشنطة
والبحر بقي طحينة
وعلق لي الزينة
وسحب لي السكينة
وقال لي يا فهيمة
أنا راجل حقاني
وجميع المشاكل
بصباعي الوسطاني
تتحل في ثواني
قلت له:
إلعب غيرها..
يا تغور من قدامي
قال بلاش تتعصب
أنا صاحب مشروع
متنقي ومسموع
وح اشوط في الممنوع
والنهضة دي بتعتي
والتوك توك.. في حمايتي
والشيشة ممنوعة
والكلفة مرفوعة..
والفلاح في رقبتي
والشهدا في رقبتي
والمطوة طلعها
وحطها في رقبتي
وقالها لي ببساطة:
يا ح تنتخب النهضة
يا ح احطلك شطة
في النص التحتاني
.. أنا قلت أنا مقاطع
مش عايزه يطناطع
أبو سلم نقالي
وهنيالك يا اختي
بولادك لتنين
ح يمرمطوا أهلينا
ويذلوا قال فينا
ح نروح ندي لمين
خلي الليلة تعدي
واجري ولا تهدي
وما تنساش تربط فوطة
علي عداد التاكسي
وسلم لي ع المترو
ومسي لي علي مصر
اللي لا عارفة إن كانت
ح تنام في العشة
ولا تنام في القصر