الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

مصر .. فيها حاجة حلوة لو بتحبها دور عليها




كتبت- مروة مظلوم

حاجة حلوة لا تظهر إلا فى الأزمات .. تلمس معها معدن الرجال أصالتهم وتختفى معها كلمات فرضت نفسها على المشهد المجتمعى الراهن فى مصر .. فشوهت صورة هى موجودة بالفعل .. مصر الجميلة .. بلدى .. نفس الصورة التى حرص الشباب فى احتفالاتهم بتحرير سيناء على إبرازها من حياتهم اليومية .
مطالبين جموع المصريين بالبحث عن أجمل مافى مصر  بعبارة واحدة «فيها حاجة حلوة لو بتحبها دور عليها »..ولأن البساطة أجمل ما فى حياة المصريين فقد رصدها نشطاء مواقع التواصل الاجتماعى  كأحد معالم مصر على النحو التالى :

لو سألت سواق تاكسى على عنوان وبدل ما يدلك قالك امشى ورايا .. يبقى مصري.
وعلى فكرة ساعات بيغير اتجاهه عشان عنده رغبة صادقة يوصلك وخايف تتوه
- لو صليت فى مكان وبعد الصلاة اللى جنبك مد ايده وقالك تقبل الله.. يبقى مصري
-لو سمعته بعد ما يضحك كتير يقول « خير اللهم إجعله خير » .. فتأكد إنه مصرى ...
- لو دخلت عليه وكان بياكل ولو حتى عيش وبصل لازم يقولك اتفضل الأكل ويعيدها عليك ثلاث أربع مرات .. يبقى مصري.
-ولما عربية تعمل حادثة فى الطريق الصحراوى أو الزراعى، وفى ثوان تقفلها خمسين عربية ينقذوا المصابين ويعدلوا العربيات و لو اضطروا يشيلوهم من على الأرض .. هم دول المصريين.
- لما تلاقى ناس بتقضى العيد فى المقابر مع حبايبهم اللى ماتوا يبقى أكيد فى مصر.
- لما تلاقى سيدة فى الرايحة والجاية عمالة تدعى لأولادها وتخلى الدنيا كلها تدعيلهم... تبقى دى أم مصرية وطموحاتها وأحلامها الشخصية فى الحياة إن ولادها يبقوا مبسوطين
- لو شفت واحد وقف فجأة و هو ماشى فى الشارع و مد ايده على حتة عيش مرمية على الأرض وقام رافعها لرأسه قبل مايحطها جنب
الرصيف... يبقى ده مصرى.
- لو شفت عامل اول ماخد اجرته قام رافعها لرأسه و بص فوق و حمد ربنا قبل مايحط الفلوس فى جيبه ... يبقى مصرى.
-لو اديت لواحد فلوس وبدأ يعدها بصوت عال وبدأ بقوله الله واحد .. ومع الورقة الثانية : مالوش تاني، ومع الورقة الثالثة: العدد ثلاثة .. يبقى أكيد مصرى ابن مصري
- لما تلاقى خناقة فى الميكروباص والأصوات عليت كل واحد فيهم بيحلف إنه يدفع للتانى ثمن التذكرة
-. لما تلاقى ست البيت بتحوش برطمانات المربى الفاضية سنين طوال بدون استخدام يبقى أكيد دى مصرية
- لما يكون عندنا ضيوف ويسلموا عشان هيمشوا ويقفوا على الباب يتكلموا ساعه يبقوا مصريين مصريين
- لما تلاقى اننا شايلين اكياس من جميع الاشكال والالوان تحت المرتبة نبقى مصريين.
- ولما تلاقى شعب فى اكبر ازمة بيمر بيها ... مابينساش يضحك ويطلع افيهاااات ويضحك اللى حواليه وكل العالم يتكلم عليه وعلى خفته
يبقى انت اكيد تقصد ... شعب مصر.