الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

قصة قصيرة يومية




محمد الدويك

المنبة يرن كل يوم فى الخامسة والنصف صباحا. لكنه يستيقظ قبله بدقائق.. يغلقه بيده اليسرى المجاورة للأباجورة. ويده اليمنى يداعب بها رأس زوجته برفق..
- نهال.. اصحى يا عسلية.
تفتح نصف عين وتقول بصوت يأتى من عالم آخر..
- عسلية..؟ ماشى يا سطا..
- بيئة أوى على فكرة..
- يا عم متشتمش ع الصبح مش عايزة اتغابى عليك.. ثم تحاول مسك الوسادة بصعوبة وتضربه على رأسه.. فيتفاداها ببراعة لا تليق مع رجل استيقظ منذ دقائق.
- كل مرة تهرب كده ومعرفش أضربك..
يضحك بصوت عالى ويقول: يا قطة انتى مشفتنيش أيام ما كنت طالب فى كلية الشرطة.. عليا النعمة كنت أسد.. بطل ملاكمة وكارتيه وفروسية ورماية.. وأول خدمتى كانت فى الصعيد اربع سنين.. كنت رمز الامن والأمان.. كنت بنزل على رجلى أجيب أتخن مجرم. ضرب نار وعربيات ونط من فوق الأسطح.
- طب قوم يا عم جيمس بوند صحى العيال.. وبعدين بص لكرشك دا وافتكر الماضى البعيد.
يخرج من باب الغرفة ويشعل نور الصالة ويتمطع قليلا ويدخل غرفة الولاد.
- يا سارة.. حبيبة بابا اصحى يالا عشان المدرسة.. يا كابتن أدهم اصحى يا بوب عندك بطولة سباحة النهاردة فى النادي. نصف ساعة ويكون الكل على مائدة الفطور. ينتهون ثم يبدأون فى ارتداء الملابس والتجهز للنزول. يرتدى الرائد ملابسه كاملة.. ويضع البيرية على رأسه ونظارة الشمس ماركة ريبان، ويتأكد أن حذاءه نظيف.. وينتظر اتوبيس الولاد.
تسلم عليه ابنته سارة وتقبله فى خده وتقول له: بابا متتأخرش النهاردة فى الشغل عشان عايزة اوريك كراسة الرسم بتاعتي.
ثم يجلس ليربط حذاء ابنه أدهم... ويشجعه: عايزك النهاردة وحش فى البيسين يا بوب.. مش هعرف آجى احضر البطولة لكن خلى اصحابك يصورك بالموبايلات.
- قشطة..
ويذهبون..
وعلى باب المنزل، تقترب زوجته، وتتأكد من هندامه للمرة الأخيرة. وتضربه بيدها على منطقة محرمة دوليا.. تقول له: خد بالك من نفسك يا محمد.. متاكلش بره هعمل النهاردة مكرونة بالوايت سوس والمشروم والبيرونى متعلماها من قناة فتافيت.. يا رب تطلع حلوة.
- ماشى يا عسلية..
دقائق قليلة ويصل عمله. ثم، صوت انفجار. ضجيج وصوت عال وهرج ومرج.. وملثمان يهربان على دراجة بخارية. والقنبلة قد اصابت الرائد محمد وفصلت رأسه عن جسده تماما.
يصمت المشهد. بينما أحدهم يظن أنه يحمى شرع الله. وينسى أنه بعد عدة عمليات مماثلة فى روسيا عام 2004 دخلت كلمة «شهيدكا» كمصطلح جديد فى القاموس الروسى لتدل على «الإرهابى المسلم». ليخسر الإسلام جولة جديدة.
وفى مكان بعيد.. سارة ترسم فى كراسة رسم.. وأدهم يرتدى ملابس السباحة ويتأهب للقفز فى المياة. ليطبق وصية أبيه.. وحش فى الماء. والطعام على المائدة لا يأكله أحد.
كاتب فى الفكر الإسلامي