العيدية شىء مقدس.. ولو كبرنا عليها هنديها للصغيرين

العيدية شىء مقدس لدى المصريين صغار وكبار وهى عادة توارثتها الاجيال وتعتبر من أهم مظاهر الاحتفال بالعيد، وغير أنها بتعطى بهجة للجميع، بيعتبروها حقاً مكتسباً لا يمكن الاستغناء عنه، الأم والأب والأقارب وأصدقاء العائلة، وسواء كان المبلغ صغيراً أو كبيراً فهى جزء أساسى من الفرحة بالعيد والشعور به.
وترجع العيدية للعصر المملوكى، واتخذت وقتها أشكالًا عديدة ومتنوعة وكانت تحت اسم «الجامكية»، فلم تعط كنقود فقط، إلا أنها كانت غير رسمية، ولكن تم تأكيد إعطائها فى العصر الفاطمى، وكانت ذات مدلول سياسى لدى الفاطميين، وكان المعز لدين الله الفاطمى عندما أتى لحكم مصر يعيطها لرجال الدولة وحاشية الملك وفقهاء الدين وعامة الشعب، وأيضا تعطى من باب صلة الرحم والأقارب.
وتميز الفاطميون بأنهم أول من صنعوا عملة تذكارية، يتم توزيعها على الناس أثناء الأعياد، وكان يصل وزن العملة إلى 194من ألف جرام ذهب، واسمها الخروبة.
وبمجرد مجىء العصر الأيوبى اختفت العيدية، ولم يذكر فى كتب التاريخ الأيوبى أى مسمى لها.
وفى العصر العثمانى، عادت العيدية وأخذت أشكالاً متعددة فكانت تقدم نقودًا وهدايا للأطفال، واستمر هذا التقليد إلى العصر الحديث.
والعيدية عادة جميلة بها رسائل حب وود وسعادة وينتظرها الأطفال والكبار مع أول أيام العيد من الجميع علشان يتباهوا ويتفاخروا بينهم وبين بعض باللى حصلوا عليه.
أكبر عيدية خدتها كانت 600 جنيه وبدى اخويا الصغير شوية.
محمد أسامة 16 سنة: متعود أنى أخذ عيدية كل سنة فى حدود 500جنيه كده، على مدار ايام العيد، والسنة دى خدت 500 جنيه مرة واحدة فى أول يوم من أبويا ومن أمى ومن عمتى ومن اعمامى ومن جدتى، إنما بقى أقل عيدية خدتها فى حياتى كانت 5 جنيهات ييجى كده من 6 سنين أو من 7 سنين، لكن الحقيقة أن أكبر عيدية خدتها كانت 600 جنيه السنة اللى فاتت وهى تعتبر مقاربة لنفس الرقم اللى متعود انى اخده فى كل مرة، وأكبر رقم خدته من شخص واحد بس كان 300 جنيه، وكمان فى حاجة أنى بدى كل سنة عيدية لأخويا الصغير مصطفى ييجى فى حدود 20 جنيهًا كده.
عيديتى كانت بنتى اسيل وبعيد على العيال بـ5 جنيهات
محمد رجب 26 سنة: كنت باخد عيدية ييجى 20 جنيهات فيما اقل وانا صغير، لكن دلوقتى بطلت من ساعة ما اتجوزت من اربع سنين، وبقيت ادى عيدية لكل عيل فى حدود 5 جنيهات أو 10 جنيهات ولحد 20 جنيهًا، وده طبعا حسب أهمية كل طفل ومدى قربه منى أو من عائلة زوجتى الكريمة، والعيد السنة دى كان مميز جدا بالنسبة لى لأنى حصلت من ربنا على أجمل عيدية خدتها فى حياتى وهى مولود جديد بنتى اسيل اللى ربنا كرمنى بها فى يوم الوقفة وفضلت مسهرانى كل أيام العيد ودى حاجة كويسة جدا، لأن مبقاش فى عيد فين لما كنا بستنى رمضان قبلها بفترة كبيرة جدا ونستنى العيد ومظبطين هدومنا قبليها بايام ونقعد نقول بكرة العيد وهنعيد وندبحك يا شيخ سيد.
كبرت خلاص اديت لبنت أختى 50 جنيهًا
محمد عبدالمجيد 16 سنة: فى العادة انا كنت باخد من 400 جنيه لـ500 جنيه من ابويا وامى وبقية عائلتى وأقاربى، لكن حاليا أنا بقالى كتير أوى مخدتش عيدية، مش لأنى مخرجتش ومزورتش حد، خالص الموضوع مش كده، لكن الموضوع وما فيه أنى حاسس أنى كبرت على العيدية، وده لأنى بقيت خال دلوقتى والحمدلله، والسنة دى بقى أديت لفريدة بنت أختى عيدية 50 جنيهًا، وإن شاء الله لما هكبر واشتغل هدى كل الصغيرين وأولاد اصحابى عيدية واشترى لهم حلويات وشيكولاتة.
شعور جميل ان ادى اقاربى الصغيرين عيدية
عبدالناصر مجدى 19 سنة: خدت 50 جنيهًا عيدية السنة اللى فاتت، وأكيد مخدتش عيدية السنة دى لأن أنا داخل ع 20 سنة، والمفروض انا اللى ادى عيدية للصغيرين وكده وتقريبا حصل بنسبة 90%، يعنى على قد مكنت بقدر كنت بعيد على قرايبى الصغيرين، زى اخويا الصغير، وأولاد خالى وأولاد عمى وكده يعنى، واديت لكل واحد فيهم من 20 جنيهًا لـ30 جنيهًا فى الحدود دى يعنى، وبصراحة دى أول سنة ابدأ اطلع من جيبى وادى عيدية، وربنا يقدرنى واعمل كده كل سنة لأن ده شعور جميل انك تخلى الناس تنبسط، وبصراحة الفلوس اللى طلعتها عيدية على اقرابى الصغيرين نصها من شغلى والنص التانى من مصروف من اهلى فى ايام رمضان.
عيدية إيه بس هو فيه حد سائل؟!
عمرو ضياء17 سنة: عديه ايه بس، هو فيه حد سائل ده أنا مخدتش عيدية زى السنة اللى فاتت دى عدت أكثر من 300 جنيه، وأخذت 100 جنيه بس من جدتى ربنا يخليها وشكلها كده جت بالغلط، لأنها السنة دى اديتنى 50 جنيهًا بس، وأدت اخويا كريم 100 جنيه، بس رغم كده فأنا ناوى أخد الـ50 جنيهًا واخرج بها وأجيب كل حاجة نفسى فيها، وخرجت فى العيد رحت سن سيتى علشان اتفسح شوية فى العيد ومصرفتش حاجة برضه من العيدية، لأنى كنت شايل قرشين كده على جنب فتقريبا صرفت 100 جنيه من التحويشة، و50 جنيهًا فى أكل ودخلت سينما وراجع بيتنا بـ20 جنيهًا.