ليلة الجمعة

 
 (العسكري) لفظ يطلق علي كل من يرتدي زياً عسكريا سواء كان عسكري مطافي أو عسكري مرور
 و(الجماعة) لفظ يطلق علي الزوجة في بلاد الصعيد
 المشهدالأول والأخير (نهار داخلي)
 (الزوجة أو الجماعة في ملابس فاضحة تجلس مع ثلاثة رجال أغراب في وضع مريب.. نسمع صوت مفتاح يدور في كالون الباب.. فجأة يدخل الزوج أو العسكري ثائراً وبيده مسدس).
 العسكري: آه يا خاينة.. بتخدعيني علي آخر الزمن.
 الجماعة: يا حبيبي ما تفهمنيش غلط.
 العسكري: أفهمك غلط يا فاجرة! مين دول اللي مدخلاهم بيتي في غيابي؟!
الجماعة: هدي أعصابك يا حبيبي.. دول أصدقائي!
 (يضع المسدس في رأسها.. ويهددها).
العسكري: انطقي لأفرغ المسدس كله في دماغك.. أصدقائك منين؟!.. وعرفتيهم امتي؟!
(الجماعة بدلع ودلال.. تبعد المسدس بيدها).
الجماعة: بلاش تهور يا حبيبي لا السلاح يطول.. وانت عارف إن الشيطان شاطر!
 العسكري: (غاضبا وثائرا): بلاش مياصة ودلع.. بقولك مين دول انطقي بسرعة.. لأني متأكد أن الشيطان شاطر بس مش أشطر مني.
 الجماعة: دول أصدقائي من زمان وكانوا زمايلي في الجامعة؟!
 العسكري: زمايلك في الجامعة! واحد أمريكاني.. وواحد قطري.. وواحد إيراني.. ليه كنتي طالبة في جامعة الأمم المتحدة يا هانم؟!
 الجماعة: يا حبيبي.. دول الممولين!.. أمال الفلوس الكتير اللي بالهبل دي تفتكر كنت باجيبها منين؟!
(العسكري يضرب الجماعة بالقلم علي وجهها بقوة)
العسكري: وكمان ليكي عين تعترفي يا فاجرة إنك بتاخدي فلوس من الأغراب.. مرمغتي شرفي في الطين.. وأكيد بتصرفي علي الحمل اللي في بطنك من الفلوس الحرام.. ويا عالم الحمل ده مني ولا يطلع ابن حرام هو كمان.
 الجماعة: يا حبيبي.. كده مخك راح بعيد قوي.. ودي إهانة لا يمكن أقبلها.. أنت بتشك في يا حبيبي؟!
 العسكري: نعم يا طاهرة.. قاعدة مع 3 رجالة ولوحدكم ومش عايزاني أشك فيكي.. وتقوليلي دي إهانة؟!
 الجماعة: طبعاً إهانة!
العسكري: إهانة.. ليه هو أنا دخلت لقيتكم بتصلوا جماعة؟! دول كانوا بيدولك شنط فلوس.. كل ده ليه؟!.. علشان تصرفيهم علي الحمل اللي في بطنك.. هو أنا حرمتك من حاجة؟! قصرت معاكي في حاجة يا مجرمة.. دأنا اديتك كل حاجة.. الكراسي والحيطان.. والشبابيك والبيبان والشوري والبرلمان.. والتليفزيونات كلها تحت أمرك.
 الجماعة: يا حبيبي.. أنا مقدرة كل تضحياتك علشاني.. لكن الفلوس دي مش للحمل بتاعي.. دي للحملة الانتخابية بتاعتي.
 العسكري: والحملة الانتخابية ممولة من 3 دول: أمريكا.. وقطر وإيران.. ليه نازلة علي منصب سكرتير عام الأمم المتحدة!
 الجماعة: يا حبيبي.. أنا كده حبيابي كتير.
 العسكري: حبايبك كتير.. هي الحداية بترمي كتاكيت.. دول أكد بيدولك فلوس لأنهم عايزين منك حاجات غير مشروعة.. أو حاجات محظورة.
 الجماعة: يا حبيبي.. ما انت طول عمرك بتدلعني وبتقوللي تعالي يا (محظورة).. روحي يا (محظورة) وفيها إيه لما يطلبوا مني حاجات (محظورة).. ما هو كله بحسابه.. والخير ح يعم علي الجميع.
 العسكري: لأ.. كده أنا الفار ابتدي يلعب في عبي من ناحيتك.. إنت مالكيش أمان خالص.
الجماعة: ليه يا حبيبي ماليش أمان.. ما إحنا أهو من يوم ما اتجوزنا.. بقالنا مع بعض سنة و3 شهور سمن علي عسل.. مفيش حاجة زعلتنا مع بعض.. إيه بقي لزمتها الفيران اللي انت مربيها في عبك دي؟!
 العسكري: أنا حسيت بالخيانة.. أول ما قوليتلي ابعد سلاحك عني الشيطان شاطر.. أنا سمعت كلمة (الشيطان شاطر).. وأنا دلوقتي اتأكدت إنك بتلعبي بديلك من ورايا.
الجماعة: وقلبك طاوعك يا حبيبي.. وصدقت إن أنا ممكن ألعب من وراك.
العسكري: طبعاً.. هو أنا مش عارف إنت تبقي مين.. وأصلك إيه.. وفصلك إيه!
(الجماعة: تنفعل بشدة من هذا الكلام.. وتظهر علي حقيقتها.. وتتخلي عن الرقة والدلال.. وتدخل في فاصل من الردح المعتبر).
 الجماعة: نعم.. نعم.. نعم.. يا خويا.. ماله أصلي.. وفصلي.. هو انت كنت واخدني من الملجأ.. ده أنا بنت ناس ومتأصلة وأهلي ورايا ملهمش عدد.. وأقسم بالله العظيم.. لو شاورت لهم بصباعي كده ح يقلبوا عليك الدنيا.
 العسكري: ها الله.. ها الله.. ها الله.. يا بنت بديعة.. اظهري علي حقيقتك.. وهاتي اللي جواكي.
 الجماعة: بقولك إيه؟!.. الزم حدودك مالكش دعوة بأمي.. بديعة دي أشرف واحدة في العالم.
 العسكري: بالراحة يا حلوة.. ما تنفعليش قوي كده.. لا يطقلك عرق.. لو مكناش عارفين أمك وأبوكي.. كنا قولنا الملايكة جابوكي!
الجماعة: لأ يا حبيبي مش كل الطير اللي يتاكل لحمه.. أنا ممكن أخلعك.. وأرميك في الشارع.. والقانون في صفي.. والبرلمان والشوري.. والدستور في جيبي.. آه فوق لنفسك يا عينيه.. الشقة كلها بمنافعها بقت خلاص.. من حق الزوجة.
العسكري: بأمارة إيه يا حلوة؟
 الجماعة: بامارة العقد اللي بيني وبينك مش انت كتبتها لي تمليك.. واللا نسيت؟!
 العسكري: وماله.. العقد ممكن يتقطع.. والاتفاق ممكن يتلغي.. والصندوق الأسود بتاعك وبتاع أهلك ممكن يتفتح من أول وجديد.. ولا أنت نسيتي نفسك يا حلوة.. ومش فاكرة كنتي بتشتغلي إيه قبل ما اتجوزك؟!
 الجماعة: لأ ما نستيش يا عينيه.. كله بالحلال كنت باشتغل في تجارة العملة.. وكنت باسلفك.. وكنت بشتغل في غسيل الأموال.. وكنت أنت عارف ومبسوط مني.
 العسكري: لأ يا حلوة.. أنا عندي صندوق أسود من كده بكتير.. أسود من شعرك المصبوغ... وأسود من الليالي السودة اللي قضيتها في السجن.
 الجماعة: نعم ياخويا.. إن كان معاك صندوق أسود من شعر رأسي.. أنا كمان عندي ملفات أسود من نني عينك..
 العسكري: يعني.. بتحديني يا بنت بديعة؟!
الجماعة: أنا ما بتحداش حد.. انت اللي داخل في شمال ومش مديني فرصة أدافع عن نفسي.
العسكري: وانت كمان اخليتي بشروط العقد اللي بينا.
 الجماعة: خلاص سيب.. وأنا اسيب.
العسكري: مش قبل ما أعرف إنت أولك فين وأخرك فين.
 الجماعة: خلاص نقسم البلد نصين.. أنت النص.. وأنا النص.
 العسكري: ومين اللي ح ياخد النص التحتاني.. ومين اللي ح ياخد النص الفوقاني؟!
 الجماعة: انت وذوقك .. أنا عن نفسي عايزة.. التعليم والثقافة والإعلام.. وأنت خد الباقي وعليهم الدفاع.. واديني الداخلية.
العسكري: دي ملابسك هي اللي داخلية يا قمر.. داخلية إيه اللي انت عايزة تخديها دي مناطق سيادية يا روح ماما.
 الجماعة: خلاص إلغيها.. لا أنا.. ولا أنت مشيها دفاع وأمن وطني.. وخلاص.
العسكري: أنت باين عليكي اتجنيتي يا محظورة يا بنت المحظورة.
الجماعة: وليه ما نقولش إني أنا محظوظة وبنت محظوظة.. تعالي في حضني يا حبيبي.. وبلاش تشمت الائتلافات الثورية فينا.. هات بوسة يا حبيبي.
العسكري: ابعدي عني.. باستك عقربة.. انت نسيتي إنك لغيتي البوس والأحضان في الأفلام بقانون صادر من البرلمان بتاع سيادتك.
 الجماعة: يا حبيبي هات بوسة من بتوع عبدالحليم حافظ إحنا لسه بنصور.. وبعدين نبقي نخلي الرقابة تشيلها.. هات بوسة بقي علشان النهاية تبقي سعيدة.
العسكري والجماعة: (يبوسوا بعض بقوة) موووووووووووو
(نهاية سعيدة)
 
 
 
حكمة 3D

■■ قال رجل حكيم:
هناك ثلاثة أنواع من الأصدقاء:
- الصديق دائماً.
- والصديق أحياناً.
- والصديق الذي صار عدواً.
■■ ويقول واحد من الإخوان:
هناك ثلاثة أنواع من الأصدقاء:
- الصديق الدائم.. هو المجلس العسكري في بداية الثورة.
- والصديق أحياناً.. هو المجلس العسكري - أيضاً - بعد تشكيل اللجنة التأسيسية للدستور.
- والصديق الذي صار عدواً.. هو نفسه المجلس العسكري.. ولكن بعد ترشح عمر سليمان للرئاسة.
■■ ويقول واحد من شباب الثورة:
- الإخوان والسلفيون ظلوا لمدة عام لهم صديق واحد: وهو المجلس العسكري..
- ولكنهم في أقل من شهر نجحوا في أن يكون لهم: 80 مليون عدو..
 
 
مسااااااء الفل
 
■ ■ قال المؤرخ المصري الكبير:
- كنت فخوراً جداً بأنني مصري.. لأن مصر بها 20٪ من آثار العالم.
- والآن أصبحت أكثر فخراً.. لأن مصر بها 90٪ من بوسترات العالم.
 
■ ■ علي الرغم من أن عدداً كبيراً من الإخوان والسلفيين يعتبرون أن «الرقص» حرام شرعاً.
- إلا أنهم اخترعوا رقصة جديدة في أقل من شهرين وهي رقصة «الديمقراطية».. وهي سهلة وبسيطة وتتكون من عدة حركات:
خطوتان إلي الأمام في اتجاه المجلس العسكري.. وخطوتان للخلف في اتجاه المرشد العام.. وخطوة لليمين.. وخطوة لليسار..
وحبة فوق.. وحبة تحت
 
■ ■ من تجارب الشعوب تأكد العالم من أن:
- الألمان أول من اخترع الطباعة.
- والأمريكان أول من اخترع القنبلة الذرية.
- والفرنسيون أول من اخترع العطور.
- والروس أول من صعدوا إلي الفضاء.
- والمصريون أول من اخترع البوسترات.