«من الآخر»: محلب اختار المحافظين على طريقة «الفكهانى»

أبدى الإعلامى تامر أمين، مقدم برنامج «من الآخر» المذاع على فصائية «روتانا مصرية»، عدم ارتياحه للمحافظين الجدد حيث قال: «المهندس إبراهيم محلب خلال الأيام اللى فاتت كان بيكلم مجموعة من الناس حبايبه اللى بيثق فيهم أو مجموعة من الإعلاميين ويقولهم متعرفوش حد كويس، عايزين حد فى المحافظين»، وكأنه يصف المهندس محلب بقلة الحيلة فى اختيار الأصلح لهذه المناصب.
واستمر «أمين» مهاجمًا «محلب»، فقال قاصدًا من يتم استتشارتهم: «خد منى ياريس ومتقلبش ورايا، نفس فكرة بتوع الفاكهة اللى بيقفوا بعد صلاة الجمعة، متقلبش ورايا خدها وبالهنا والشفا انت والعيال»، وهو دليل على أن «أمين» -إن كان كلامه صحيحًا- وأخذ المهندس محلب برأيه لن يتحدث بهذه اللهجة أو يفصح عن هذا الأمر، وكأنه يصف أن المحافظين الجدد جاءوا بـ«العشم».
واستنكر «أمين» على «محلب» طريقته فى اختيار المحافظين، فقال: «أنا بحترم نواياك الطيبة إنك عايز تستشير وتسأل بس مش بالأسلوب دا، فى رأيى دا مينفعش، وعايز أقول إن فى اتنين من المحافظين الحاليين اتخدوا بالمنظر دا، لكن مش هقول أسماء حفاظًا على السرية، بس لو طلعوا وحشين هتكلم السياسى أو الإعلامى اللى قالك عليه وتقوله إخص عليك، بس أهالى المحافظة اللى انت حطيته فيها لبسته ومش هيكفينا أسف اللى أشار عليك»، تشعر من حديث تامر أمين أن التعيين يتم بطريقة «سمك لبن تمر هندى»، وأن الأمر يسير دون تمحيص فى السيرة الذاتية لكل محافظ، وأن هذه هى الطريقة المتبعة فى كافة اختيارات رئيس الوزراء، وإن كانت تصريحات «أمين» صحيحة لكانت حكومة محلب فاشلة، لكنها حتى الآن تغلب إيجابياتها على سلبياتها.