«من الآخر» لـ«أبو النجا»: «لما تشتبك مع الإعلام يبقى بتخش عش الدبابير»

انتقد الفنان خالد أبوالنجا بعض الإعلام المصرى، خلال حواره مع قناة «دويتش ڤيلا» الألمانية، ووصفهم بـ«الأمنجية»، وأن آرآئهم اختلفت تبعًا للموجة التى يسير فيها التيار الحاكم، فقال: «أنا آرائى ماختلفتش، لكن اللى اتغير هو رد الفعل، ففى إعلام بنسميه الأمنجى، دى كلمة مصرية شوية معناها إنه ميال للسلطة، طبعا البعض وليس الكل، فهتلاقى الإعلام ده بيهاجمك وبنفس الكلام».
ورغم ما عرف عنه بانتقاده الشديد للرئيس عبدالفتاح السيسى، إلا أنه عبّر عن سعادته بضربة مصر ضد الإرهاب فى ليبيا، فقال: «أنا مش ضد السيسى كشخص، أنت عملت حاجة عظيمة إنك كنت مع الشعب، لكن لما رشّح نفسه أنا كنت ضد ده، فطريقة حكم السيسى هى فكر أمنى لن يحل شيئًا، لكن مفيش حد ضد كل حاجة وفى الآخر لازم تختار، من حق مصر كدولة يكون عندها رد حاسم للإرهاب ضد مواطنيها».
ولم تمر هذه الواقعة مرور الكرام، فقد سخر «تامر أمين»، مقدم برنامج «من الآخر» المذاع على فضائية «روتانا مصرية»، من «أبو النجا» لتوجهاته المعارضة دائمًا لحكم السيسى، فقال: «ياعم الحاج.. ياستنا... يا أختنا.. ياحبايبنا، بتجيب الكلام لنفسك ليه وحتى لو أنت عايز تخش فى سجال مع الإعلاميين ومع الرأى العام وكده اختار الوقت، لأن العدو قبل الحبيب قال اننا فى حالة حرب، ففى الحالة دى بتطلع وتخبط؟!».
واستشاط «أمين»: غضبًا من وصف الإعلام بـ«العرايس والأمنجية»، موجهًا تحذيرًا شديد اللهجة إلى «أبو النجا» بسبب هذا التشبيه، فقال: «لما تيجى تشتبك مع الإعلام والإعلاميين أنت بتخش عش الدبابير يابابا».
واستنكر «أمين» هجوم «أبوالنجا» الدائم على الرئيس السيسى، فقال: «مش من حقك تهاجم السيسى ولا أنا من حقى أهاجم حد، أنا من حقى انتقد، حتى لو شايف إن فى حاجات تهاجم فيها السيسى هل ترى أن ده الوقت المناسب لانتقاد رئيس الجمهورية وتشويه الدولة المصرية واحنا فى حالة حرب؟!».