متصل لـ«أبو الحسن»: اللى بتتكلموا فيه دا قلة أدب‏

عرضت شريهان أبو الحسن، مقدمة برنامج «ست الحسن» المذاع عبر فضائية «ON TV»، موضوعًا أثار حفيظة بعض المشاهدين ممن يعتقدون أن مناقشة مثل تلك الموضوعات عبر الإعلام المرئى غير مسموح به، فكان الموضوع محل النقاش يدور حول وجود بعض الأطفال بدءًا من سن ست سنوات يتطلعون إلى اكتشاف أجسادهم، بالتالى يلجأون إلى خلع ملابسهم أو الطلب من زملائهم فعل ذلك، ويتم تصنيف ذلك بـ«شاذ جنسيًا»، لكن هذا الأمر غير صحيح، حيث قالت «أبو الحسن»: «ملف مهم وغاية فى الحساسية، إزاى أوعى ابنى أو بنتى اللى بيبقوا عايزين يكتشفوا جسمهم، وتكون بطريقة سليمة وصحيحة، وكمان لا أتعامل مع البراءة على أنها المرادف للجهل وعدم الوعى والثقافة، عشان نرد على كدا معانا د. رضوى فرغلى، المعالجة النفسية».
وبعد عدة مكالمات والاستفاضة فى الحديث عن هذا الموضوع الشائك بطريقة علمية، قام أحد المشاهدين بعمل مداخلة هاتفية مع البرنامج، موجهًا اللوم الشديد لمناقشة مثل تلك الموضوعات على مرأى ومسمع من الجميع، فقال: «الكلام اللى بتتكلموا فيه دا يعتبر قلة أدب»، مما وضع المذيعة فى موقف محرج، لكنها استطاعت الخروج منه بحنكة شديدة، فقالت: «حضرتك مش مضطر تتفرج علينا، واحنا حاطين إشارة للكبار فقط لأنه موضوع يهم الآباء والأمهات اللى حريصين على توعية ولادهم ومنحطش راسنا فى التراب ونسميها قلة أدب، أكيد ممرتش بتجربة زى كدا فمش مهتم بموضوع الفقرة، لكن أكيد سمعت التساؤلات اللى جاتلنا، لأنه فعلا موضوع مهم ومحتاج إجابات دقيقة».