26 يونيو 2019 - 45 : 14
رئيس مجلس الإدارة
عبد الصادق الشوربجي
رئيس التحرير
احمد باشا

قصيدة بواقى

1



وليه ياطير

تسيب الكلام عريان

والغنوة ع المكشوف

وبرغم أى ظروف

بتغيب مع الغايب؟

وليه يا حلم بتسافر مقبل

وتسيب رباط البحر للموال

تصفى الصبايا عليك

وتدوب من المكتوب

وإنت فى حضن عجوز

واكله الزمن وراميه؟

2

نتش ضلوعك من ضلوع الآخرين

كدس فى روحك كل تباريح الحروب

ياباي

أعذرنى يا فالق سطوح الشمس

ونازف للمدى « عيسوى «

ياباي

مقدرش اشيل عنك غير انى اشيلني

بنكبر كل مانشوفك سمو

وتكسر نياتنا الريح

كل مانلاحظ جفاك

3

بينى وبين المدبوحين حكايات

متقبلش التنافس

أوراق

من برة عمَّرها الربيع

وفى قلبها

شق الخريف سكنه

بنات

أجمل من شروق الشمس فى الطلة

ومدكنة الليل فى الصدور

متدكسة كراكيب

وتقولهم سلامات

يتقنعروا ويتفتفوا ويبكتوا فى روحك

مع إنهم عدمو

واستسلموا لنقد الغراب

واعترفوا بالمدسوس

طول ما اللى شق الجرح

سارح ف كون تاني

عمر الجراح ماتطيب

4

شايلين فى قلوبنا حكاوى متحملهاشِ جبال

حكايات مكفولة على قلوبنا

وفـ راسنا صور

وبواقى طفولة

متغير توبنا

لا واخدنا الشعر من الدنيا

ولا راضى يتوبنا

حرِّمنا عليك يا كلام مستور

يا صور شايلالنا وراها جسور

كفيانا نغم ونسيم واطلال

وكلام بطال

ميجبش حقوق لأصحابها سخيف شيَّال

غيرنا كتير بيقولوا كلام متعرى وواضح ويفوتوا فى قطر

وإحنا نغلف ونشكِّل

ونرد حيارى مالينا الخزى فى رد سؤال

كفيانا خيال

5

يا لامم فى قلبك سراير روايتك

ياباهت فى صورتك وصورتك مرايتك

متسرحش دايما فى صايب وخايب

تأمل وجودك هتفهم حكايتك

يا ناخب فى روحك شقوق للى عدوا

وسايب براحك بُرُبٍّ يعدوا

تعالى محدش هيلزم بوعدوا

ده كتر انتظارك ودمعك يهدك.

شعر - محمود نبيل العيساوي