إنذار أخير

الأعمال للفنانه:  زينة مصطفى سليم

يسيل بجوار النيل فى بر مصر نهر آخر من الإبداع.. يشق مجراه بالكلمات عبر السنين.. تنتقل فنونه عبر الأجيال والأنجال.. فى سلسلة لم تنقطع.. وكأن كل جيل يودع سره فى الآخر.. ناشرا السحر الحلال.. والحكمة فى أجمل أثوابها.. فى هذه الصفحة نجمع شذرات  من هذا السحر.. من الشعر.. سيد فنون القول.. ومن القصص القصيرة.. بعوالمها وطلاسمها.. تجرى الكلمات على ألسنة شابة موهوبة.. تتلمس طريقها بين الحارات والأزقة.. تطرق أبواب العشاق والمريدين.  إن كنت تمتلك موهبة الكتابة والإبداع.. شارك مع فريق  «روزاليوسف» فى تحرير هذه الصفحة  بإرسال  مشاركتك  من قصائد أو قصص قصيرة أو خواطر «على ألا تتعدى 550 كلمة» مرفقا بها صورة شخصية على الإيميل التالى:

[email protected]

 

إنذار أخير

 

شعر

 

ميسرة صلاح الدين 

 

نفسى فى طيارة ورق 

بس مش عارف 

صرفت فلوس كتير 

قريت كتب 

اتفرجت 

على فيديوهات

 تعليمية 

ولسه,مش عارف 

نفسى فى طيارة ورق 

معايا دلوقتي

ورق بيلمع

شرايط ملونة 

حتة دوبارة 

وشوية خشب

نفسى فى طيارة ورق 

اتحولت

 مرة

لسحابة

علشان 

 يبقالى

 خبرة

 فى الطيران 

واتحولت

 مرة تانية 

 لطوبة

علشان

 يبقالي

 خبرة 

فى الوقوع 

ع الأرض

 

واتحولت

 مرة 

لشجرة

علشان

 أعرف

 أمد جذور

 لأحلامى 

نفسى فى طيارة ورق 

بصراحة بقى

 أنا لا نفسى 

فى طيارة ورق

 ولا حاجة 

أنا نفسي

 فى سعادة العيل 

اللى بيطيرها

العيل الصغير 

اللى  لما بيضحك 

الضحكة بتوصل 

 لحد ركبته

أعمل ايه

 دلوقتي

بالورق اللى معايا 

والشرايط الملونة

والدوبارة

 اللى لو فردتها

 تقدر 

 تتحدى السما

أعمل إيه

 دلوقتي

غير إني

 أذوَّق نفسى 

واطلع 

على

 سور البلكونة