الجمعة 29 مارس 2024
رئيس مجلس الإدارة
هبة صادق
رئيس التحرير
احمد باشا

الإعلاميون يوجهون رسائل تفاؤلية للمشاهدين ضد كورونا

نشر عدد من المذيعين رسائل إيجابية للجمهور، فى محاولة منهم لبث طاقة من الأمل والتفاؤل لتخفيف حالة القلق والتوتر من وباء كورونا.



الإعلامية رضوى الشربينى مقدمة برنامج «هى وبس» على قناة CBC سفرة، كتبت عبر صفحتها الشخصية على موقع التواصل الاجتماعى فيس بوك: «هتعدى ونكمل».

وأضافت: «الحل الوحيد إن احنا نركز نعيش حياتنا إزاى وأول خطوة هو التفاؤل والثقة أنه ربنا سبحانه  وتعالى ليه حكمة فى كده».

وسخرت قائلة: «كورونا طلع لها ميزات للمرأة، بعدما كانت بتشتكى إنها مش عارفة جوزها بيروح فين، دلوقتى مش هيعرف يخونك، كورونا وقفت الخيانة، ممكن كل ست تحقق أحلامها دلوقتى أن تخلى جوزها يذاكر للولاد، ويساعد فى البيت، كورونا هتساعد على ترابط العيلة وتجمعهم على سفرة واحدة».

المذيعة لميس سلامة مقدمة برنامج «صباح البلد»، على قناة صدى البلد، قالت: «الحمد الله على نعم كتير فى حياتنا، والأزمة دى ماشية على الكل بس هتعدى، بلاش إحباط، والأزمة دى محتاجة أننا ندعم بعض نفسيًا ونسند بعض، ونسمع الكلام وننزل للضرورة فقط، الحل فى ايدينا، كله خير تفاءلوا هتعدى».

وأضافت «سلامة»: «نبدأ اليوم متفائلين، وقولوا كلام له تأثير ايجابى لبعض، اطمنوا وربنا اكيد شايلنا الخير».

المذيعة ايمان رياض، مقدمة برنامج «من القلب للقلب» على قناة MBC مصر، كتبت رسالة تفاؤل لمتابعيها عبر صفحتها الشخصية على موقع فيس بوك: «هتمر وهتعدى الأزمة، طول ما انت عندك يقين بالله أن اللى إنت فيه هيعدى وهيمر».

الإعلامية دعاء فاروق، مقدمة برنامج «اسأل مع دعاء» على قناة النهار قالت: «أزمة كورونا  فيها عبرة وعظة لكل الناس، وبعد شهر واحد من سيطرة فيروس اكتشفنا أن الناس دى بكل قوتها من دول عظمى لا يملكوا اى هيمنة وأن ربنا قادر يبدل موازين الأرض فى ليلة ويجعل القوى محتاج ويجعل الغنى بكل ما يملك من أدوات فقير».

وأضافت «فاروق»، «يارب احمينا كلنا من الفيروسات، واشفى المرضى، واكتب الثواب والأجر لكل شخص بينزل الشغل فى الوقت ده، ولازم ندعى ربنا».

كما وجهت المذيعة منى عراقى، مقدمة برنامج «المهمة» على قناة النهار، رسالة لمتابعيها قائلة: «فقدت ايه بسبب كورونا، حرية التنقل عاداتك، طقوسك، كله يتعوض، ما عدا صحتك، لو أنت بتابع ما يحدث حولنا، تعرف أن أهم حاجة الحفاظ على صحتك الفترة دى مش أى عنصر تانى، سواء رزق، فلوس أو شغل، دول عظيمة وكيانات حكمت العالم، لكن الآن تهتز تحت رجلين كورونا عشان يرحمها».

الإعلامية منى عبد الغنى مقدمة برنامج «الستات ميعرفوش يكدبوا»، على قناة CBC، وجهت رسالة تفاؤل للمشاهدين، مطالبة لهم بضرورة التخفيف عن نفسهم من خلال ممارسة الرياضة والاستماع إلى الموسيقى. 

المذيع محمد نشأت مقدم برنامج «ما وراء البرنامج» على النهار: «كورونا رب ضارة نافعة، والقعدة فى البيت ممكن تتحول لشىء إيجابى، فى حاجات معملنهاش بسبب انشغالنا، نقدر نعملها دلوقت مثل الرياضة، القراءة، نذاكر لابنائنا، لمة العيلة على سفرة واحدة مثل زمان».