مصطفى: عايز أتجوز والمصاريف كتير.. والنت شباكى ع الحياة

■ كلمنا عنك؟
 
- مصطفى سيد على، عندى 25 سنة، شغال فى شركة محمول كبيرة فى خدمة العملاء، أتأخرت كتير فى الدراسة عقبال ما أخدت بكالوريوس التجارة فى جامعة القاهرة لأنى كنت بسقط كتير ومبحبش الدراسة.
 
■ وليه اخترت المهنة دى؟
 
- الشغلانة دى أنا فيها من أيام الجامعة، قدمت أوراقى فى مسابقة توظيف ونجحت، ورغم أنى تعليم حكومى بس قدرت أطور من نفسى فى اللغة عن طريق سماع الأغانى الإنجليزية والفرجة على الأفلام أنا مش فاشل يعنى بس التعليم هو اللى مش فاهمنى.
 
■ بتعمل أيه لما بتبقى فاضى؟
 
- أنا بشتغل فى اليوم 9 ساعات، وباقى اليوم بقضى منه ساعتين أو 3 على الكمبيوتر أقلب فى الفيس وأقرأ أخبار، مقالات، قصص ساخرة، أو أتشات مع صحابى، وكده يعنى.
 
■ الثورة أثرت على دخلك؟
 
- لأ.. أنا مرتبى يتراوح ما بين 1800 إلى 2500 جنيه، لا قل ولا زاد بعد الثورة بس المشكلة أنه مش بيكفينى مصاريف.
 
■ أيه علاقتك بالنت؟
 
- شباك مهم ليا على العالم بعرف منه الدنيا حوليا.
 
■ بتحلم بأيه؟
 
- نفسى أخلص توضيب شقتى علشان أتجوز، أنا خاطب، والشقة ومصاريفها أرهقونى ونفسى كمان أترقى فى شغلى علشان أجيب فلوس أكتر، لأن الجواز ودخول الدنيا محتاج مصاريف كتير.