فيفى عبده لــ«90 دقيقة»: الراقصات ملائكة.. والرقص مش حرام

كتب- محمد خضير

 

شددت الراقصة فيفى عبده: على أن كلمة راقصة ليست بالقليلة، مضيفة: «الراقصات ملائكة والعالم كله بيقدر الراقصات».
وأضافت فيفى عبده، خلال لقائها مع الإعلامية إيمان عز الدين ببرنامج «90 دقيقة»، على قناة «المحور» أمس الأول أن: «الرقص مش حرام وماينفعش حد يحرمه وربنا هو اللى بيحرم محدش تانى وهو اللى بيحاسب الناس على أفعالهم»، متابعة إن الراقصات فى مصر «لوسى ودينا» والباقى تلاميذ، مشيرة إلى أنها علمت الأجانب الرقص.
وشددت الراقصة فيفى عبده، على أن الفنان يبذل مجهودا كبيرا لكى يصل إلى ما يحلم به، مضيفة: «إحنا بنشقى على ما نجيب القرش».
وردا على سؤال حول رأيها فى البرلمان قالت: «أمى قالتلى حاجتين ما تتكلميش فيهم الدين والسياسة».
وأضافت فيفى ان «الأسعار بقت نار وكيلو البامية وصل 15 جنيهاً يعنى عشان أعمل طبخة محتاجة 500 جنيه، الموظف هيجيب منين»، و«المصريون ممكن يعيشوا بأى حاجة لو بـ5 جنيهات ممكن ياكل أى حاجة عادى، لكن الضمير انعدم».
وقالت الراقصة فيفى عبده: إن فكرة أغنية «أنا حرة مبحبش ضرة» موجودة منذ 3 سنوات، وتم تصويرها فقط منذ 3 أسابيع بعد أن استطاعت تقليل وزنها.
وأضافت «أنا اتجوزت 5 مرات وماينفعش أتجوز راجل متجوز واحدة تانية، أنا عقدة حياتى الضرة لأن والدى كان متجوز اتنين»، متابعة: «أنا مسالمة جدا وطيبة جدا وعمرى ما سألت جوزى أنت كنت فين عشان كبريائى ومبحبش الراجل البخيل».