محلية النواب: كارت أحمر لقيادات بالجيزة قريبًا

كتب ـ حسن عبدالظاهر


انتقد النائب محمد الحسينى، وكيل لجنة الإدارة المحلية بمجلس النواب، أداء بعض الأجهزة التنفيذية فى الوحدات المحلية، وشن هجومًا كبيرًا ضد مديريات الطرق ووصفها بـ«الفاشلة»، قائلا: فيه ناس بتشتغل بجد وفيه ناس هتاخد كارت أحمر قريبًا، جاء ذلك خلال اجتماع لجنة الإدارة المحلية بمجلس النواب، لمناقشة مشروع موازنة محافظة الجيزة وخطة التنمية الاقتصادية والاجتماعية للعام المالى 2018/2019: «عايزين نعرف مدينة الجيزة إيه المشروعات اللى عملتها، ومديرية الطرق فى الجيزة مشروعاتها إيه».
وانتقد وكيل لجنة الإدارة المحلية، زيادة بند تعويضات العاملين فى الجهود غيرالعادية بموازنة محافظة الجيزة بمبلغ مليون جنيه عن السنة الماضية، قائلا: «تعويضات العاملين فى بند الجهود غير العادية زادت مليون جنيه، طيب أنت عندك جهود أصلا، إزاى تزود مليون جنيه من قوت الشعب أنا هنحاسبك على أداء وبرامج، بعض المسئولين مش بيعملوا حاجة.. وديتونا فى ستين داهية والمواطن مش لاقى حاجة، رئيس الجمهورية شغال نتعلم منه، ونخلى القوات المسلحة تشرف هى على المشروعات، إحنا بنتكلم فى مصير شعب، فيه 8 ملايين مواطن فى الجيزة، وعايزين نساعد المحافظ والأجهزة التنفيذية يشتغلوا.