لو شوفت مبارك فى الشارع هتقوله إيه؟

 
 
 
تناولت صفحة «مصر بوك» صورة للرئيس السابق حسنى مبارك تظهر مشيه فى أحد الشوارع خلال توليه للرئاسة، ورافق الصورة سؤال موجه لأعضاء الصفحة «لو قابلته فى الشارع هتقوله ايه؟».. وكانت المفاجأة ما يزيد على 4 آلاف تعليق ينعى أيامه وأمنه وآمانه «ومعظمها بدأت بـ«إحنا آسفين ياريس» اخترنا لكم عدداً من الإجابات وتعليقات شباب ثورة 25 يناير.
 
 
إذ علقت منال عبدالعزيز قائلة: «إحنا آسفين ياريس.. اتبطرنا على النعمة».
ورد عليها عبدالغفار نوارة «اتبطرنا على النعمة؟ أصلك مش اتظلمتى زى الأجيال اللى ظلمها ولو كنتى اتظلمتى واتقهرتى كنتى هتفكرى مليون مرة قبل ما تكتبى كده وعمرى ما هقول يرجع تانى ربنا يسامحه بئه».
وعقبت علياء مصطفى: «ربنا يسامحه هو اللى وصلنا للى إحنا فيه دلوقتى.. فيها إيه لو كان مشى بما يرضى الله».
أما جانا عمر فعلقت قائلة: «آسفين، يا رب يكونوا عرفوا قيمتك بس بعد إيه فات الأوان».
حمادة نورالدين قال «ولا يوم من ايامك يا ابو علاء ياحبيبى».
أما ياسر محمد فعلق قائلاً: «هاخده بالحضن واقول له فين أيامك يا اللى كنت مخلينا بنام واحنا مطمنين مع انك كنت بتسرقنا بس كنت عارف توزنها إزاى وعمرك ما رجعت فى قرار».
وقال رياض بدر فى تعليقه «لو كنت خدت بنصيحة الشيخ الشعراوى قبل ما يموت كان التاريخ سجل اسمك بحروف من دهب والآن أقول لك حسبى الله ونعم الوكيل».
وعلق عماد وهيب «كنت ابعد نظرا منا لو يرجع الزمن تانى أكيد كان تصرفنا معاك اختلف كتير بس أنت ياريس شاركت بجزء واحنا كمان شاركنا بجزء انت بعدم حرصك على الفقير فى آخر عهدك واحنا بعدم صبرنا كام شهر».
ورثى محمد فهمى أيام المخلوع فقال: «لن ننساك كبطل فى أكتوبر ولن ننساك فى تدميرك لشعبك فى سنواتك الأخيرة ولن ننسى إن انت اللى جبت لنا الإخوان ودى لوحدها تستحق الإعدام عليها».