ابتكارات لأطباق الرنجة والفسيخ فى شم النسيم 2013

 
رنجة بالمسطردة
المقادير:
رنجات - بصلة – 4/1 كوب خل – 4/1 كوب ميه – ملح وفلفل أسود - 2 ملعقة مسطردة – فلفل ملون مفروم – 2/1 حزمة شبت مفروم .
الطريقة:
أول حاجة هتنقعى الرنجة فى ميه مغلية لمدة 2 : 3 دقائق علشان تنزل الميكروبات.
نظّفى الرنجة وانزعى منها السلسلة والجلد والرأس والذيل، واقسميها نصفين.
 قطّعى البصل حلقات رفيعة ورصّيها فوق الرنجة.
اخلطى الخل والميه والفلفل الملوّن المفروم والشبت المفروم والفلفل الأسود والمسطردة واطبخيهم على النار لمدة 6 : 8 دقائق.
سيبى الخليط ده يبرد وصبّيه على الرنجة وغطّيها وحطيها فى الثلاجة مدة كافية علشان الرنجة تتشرّب الصوص، وبالهنا والشفا.
فسيخ بالكريمة
المقادير:
4 فسيخ – 2 بصلة – ليمونة – 2/1 كوب زيت – كوب كريمة طهى -
ملعقة صغيرة سكر – 4/3 كوب عصير ليمون.
الطريقة:
انقعى الفسيخ فى ميه مغلية لمدة 2 : 3 دقائق، وبعدين نظّفيه واخليه.
اقسمى الفسيخ نصفين وحطّيهم فى قالب عميق، وحطّى بينهم شرائح رفيعة من البصل وشرائح الليمون.
اخلطى عصير 3 ليمونات مع السكر والزيت وصبّيهم على الفسيخ.
غطّى الفسيخ وحطّيه فى الثلاجة لمدة نصف يوم أو يوم كامل.
طلّعيه من الثلاجة وصفّيه من السائل، وبعدين خدى 4 ملاعق كبيرة من السائل ده واخلطيه مع الكريمة.
عند التقديم: صبّى الكريمة على شرائح الفسيخ وزينيه بالبقدونس.
 

رنجة بالخل والسكر
المقادير:
4 رنجة – كوب خل - كوب سكر – 2 ثمرة جزر – بصلة صغيرة – 2/1 كوب ميه - فلفل أسود وأبيض – 2 ملعقة صغيرة مسطردة.
الطريقة:
انقعى الرنجة فى ميه مغلية لمدة 2 : 3 دقائق، وممكن تنقعيها فى لبن علشان تتخلصى من الملح الزيادة .
نضّفيها واخليها بس سيبى الجلد فيها وقطّعيها لشرائح رفيعة.
اخلطى الميه والسكر والخل والمسطردة والفلفل، وحطّيه على النار لحد ما يغلي، وبعدين ارفعيه وسيبيه يبرد.
رصّى الرنجة وحلقات البصل والجزر فى قالب وصبّى عليهم الخليط، بحيث إنه يغطى الرنجة كلها .
سيبى الرنجة فى الثلاجة مدة كافية لحد ما تتشرّب من الخليط كويس، وقدّميها.
سلطة الرنجة
المقادير:
2 ثمرة جزر – 2 ثمرة بنجر – خيار مخلل – فلفل ابيض - حبة بصل صغيرة - رنجة متوسطة مخلية – 2 ثمرة بطاطس متوسطة.
ولعمل الصوص:
كوب كريمة أو زبادى - ملعقة عصير ليمون – 2 ملعقة عصير بنجر – سكر – ملح.
الطريقة:
اسلقى البطاطس والجزر فى حلة، واسلقى البنجر فى حلة تانية.
قشّريهم وقطّعيهم مكعبات أو أى شكل تحبيه، ومعاهم البصل والخيار المخلل والرنجة واخلطيهم مع بعض.
اخلطى مكونات الصوص كويس وصبّيها على السلطة، وحطّى عليها مكعبات البنجر قبل التقديم على طول.
 

معجون الرنجة
المقادير:
كيلو رنجة – 2/1 كوب طحينة – 3 ثمرة طماطم – 2 فلفل حامى – كمون وشطة – عصير ليمون – بصلة صغيرة – زيت وخل.
الطريقة:
اسلقى الرنجة فى ميه مغلية لمدة 2 : 3 دقيقة علشان تقتلى الميكروبات والبكتيريا.
نضّفيها وانزعى منها الشوك والجلد واخليها تماما وقطّعيها قطع صغيرة.
قطّعى عليها البصل والطماطم والفلفل وحطّى معاهم الطحينة والخل والكمون والشطة واضربيهم فى الخلاط.
هيطلع معاكِ معجون رنجة وعند التقديم حطى عليه زيت وعصير ليمون، وقدّمى معاه عيش محمص.
ملحوظة:
ممكن تحطّى معاها البطارخ، وممكن تعملى البطارخ بالطريقة دى لوحدها من غير رنجة.