النشطاء يدشنون معبد أنابيب بح وموقع أنابيب دوت كوم لبيع واستبدال الأنابيب المستعملة

فتش فى نكات المصريين عن آلامهم واحتياجاتهم الأولية التى أنهكهم البحث عنها.. إيمانا منهم أن الشكوى لغير الله مذلة..  يلجأون لجلد حكوماتهم بنكاتهم وتعليقاتهم الساخرة على الأزمات  التى عجزت أجهزة الدولة عن حلها وعلى رأسها أزمة الأنابيب.. التى أشعلت مواقع التواصل الاجتماعى بعبارات تهكمية وكميكات ساخرة رصدنا لكم بعضها:
شوفتو بقى واحنا اللى ظلمنا الحكومة المسكينة.. أتارى دخول فصل الشتاء مبكرا قبل أوانه هو السبب فى أزمة الأنابيب...هما بيقولو كده آه وربنا...
أزمة الأنابيب سببها أن الشتاء جه بدرى الأيام دى قبل عربية الأنابيب.
بطلوا اشاعات عمالين تقولوا أزمة أنابيب يا إخوان يا ماسونيين مفيش أزمة أنابيب لأن اصلا مفيش أنابيب.
ثبت علمياً أن أزمة الأنابيب يتشال فيها مدير مستودع لكن أزمة بنزين 92 يتشال فيها رئيس جمهورية لاتتعجب ياسيدى إنها  طبقية الأزمات.
قبضوا على عودة «عشان يسألوه حليت أزمة الأنابيب إزاى».
المشكلة لو اﻷنابيب هيوزعها الجيش مش فى فكرة الدور اللى عايز يلعبه ﻷن كل خناقة هتحصل ع اﻷنابيب هيتحول فيها العشرات للمحاكمة العسكرية.
مشروع يكسب دهب.. موقع أنبوبة دوت كوم.. لبيع وشراء واستبدال اﻷنابيب الجديدة والمستعملة.. هى دى مصر ياعبلة.
من ناحية أخرى قام الشباب برفع صورة يظهر فيها قدماء المصريين وهم يحملون أنابيب غاز على رءوسهم مكتوب عليها «معبد - اله – أنا بيب – بح».. وباجور مشتعل يحمل تعليق راجعنلك ياغالى.
وجاءت تعليقاتهم عليها على النحو التالى وعلق اشرف على «والله مش ممكن شعب زى السكر وذكى ربنا يحمى شعب مصر بجد»، وعلق على تشكا «يارب ماتحرم الشعب المصرى من الضحكة الحلوة وتكمل بفوز مصر على غانا 6 -«الدعاء يا مصرين الدعاء» ووصف شيكو «شعب جامد بجد بحبك يا ام الدنيا يالى هتكونى اد الدنيا».