هاللو يا هاللو

بمناسبة شهر رمضان الكريم الجميل اللى جانا السنادى باجمل نجاح واجدع قفا معلم على بتوع الفوضى الخلاقة والشرق الأوسط الجديد وبتوع المواسم وبتوع الرصيد اللى بيزيد ف البنوك من رد الجميل اشى جوايز دولية واشى نشترى مذكرات سعادتك بالشئ الفلانى (مع انه مالوش ذكريات تذكر يعنى) واشى نوبل واللى ماشفناش خلقهم ف التلاتين من يونيو علشان جالهم ظروف منعتهم غالبا وسابوا اجدع شعب ينزل للشوارع على نضافة تحميه قواته المسلحة يختار مصيره مايختارلوش حد من برة وجاله رئيس (مؤقت بس هيبة وفخامة) بيقول خطبته ف تمن دقايق خالصة مخلصة تخلوا من قلش الاستاند كوميدى اللى كان ربنا بالينا بيه المادة الخام لبرامج الكوميديا اللى زمانها بتتحسر على أيام الخطب الاسترتش الكوميدى وبمناسبة شهر رمضان بقى وفوازير رمضان لجاهين ونيللى وشريهان اللى وحشونا قلت اسلى صيامكم بفوازير (هاللو يا هاللو) واهو نتسلى لحد ما ليالى رمضان الجميلة تخلص والمسارح ترجع تفتح وتنور تانى زى زمان بدل البيات الشتوى ده وهى كالتالى. 

١ - هل تتبع تونس وليبيا واليمن وتركيا وسوريا خطوات مصر فى ثورات (الصيف العربي) ولا ايه؟
٢ - هل بيت غادة عبد الرازق فى مسلسلها ده فى كوكب الأرض؟ 
٣ - هل شاهدت سمسمة وسوسو ولولو أبو دمعة فى أى مظاهرة فى أى ميدان خلال ثورة تلاتين يونيو؟
٤ - (اختر ما بين الاقواس) كيف صار سمسمة ولولو وسوسو من الأثرياء (جوائز دولية – بيع مذكرات – لقوا خاتم سليمان) مثلا يعنى
٥ - علل سر لجوء المسئولين فى بعض دول الربيع الى دكاترة التبول اللاارادي 
٦ - هل عرفت من هو الطرف التالت؟
٧ - اذكر عدد بائعى الحلبسة والحمص الشام وغزل البنات على كوبرى قصر النيل. 
٨ - مليون نفر يعنى استاد القاهرة مليان على تمة عينه عشر مرات هل توجد اشارة فى مصر تسع هذا العدد؟
٩ – هل المسئولين فى تركيا بعد اللى عملناه هايجيلهم قلب يحرمونا من فاطمة ونور وهوياااااام وكريم ومهند وهانعيش ازاى من غير فاطمة؟
١٠ - هل شباب وزارة الثقافة اللى زى الورد واللى لموا حواليهم ناس ياما لا يستطيعوا أن يكونوا حزب شبابى يحمل التوعية السياسية والفكر المتقد للناس الغلابة على أرض مصر الحقيقية؟
١١- هل هايرجع المصرى واحد بعد كل محاولات تقسيمه؟
١٢ - هل زوربا لشباب باليه اوبرا القاهرة الجميل ف الزمالك ف الشارع تقدر تلف مصر كلها توعيها بالفن الجميل؟
١٣ - هل هناك من مازال يشاهد الجزيرة؟
١٤ - هل ساهمت ولو بجنيه ف صندوق دعم مصر؟
١٥ - هل ثورة تلاتين يونيو ثورة شعبية ام ثورة شعبية برضه؟
١٦ - هل تكف الحيزبون ذات الشعر الأصفر والعندليب الأسمر عن دس انوفهم فيما لا يعنيهم فى ارض المحروسة؟ 
اظن كده تسلوا صيامكم لحد العيد وكل سنة ومصر بالف الف خير على كل حبايب مصر المخلصين.