«كان عينا ميهراجاااان»

السنة دى سافرت بالصدفة الكام شهر اللى فاتوا وزرت ثلاثة مهرجانات مسرحية عربية الاول كان اسمه المهرجان العربى بتعمله الهيئة العربية للمسرح كل سنة ف بلد مرة ف مصر ومرة ف بيروت ومرة ف الدوحة وهكذا، المهرجان التانى بقى كان فى الشارقة واسمه مهرجان ايام الشارقة المسرحية وعملوا منه تلاتة وعشرين دورة تصوروا المهرجان التالت بقى انا لسه والله فيه ومارجعت ام الدنيا (يعنى باكتب المقالة دى وانا هناك بعيد عن التلج اللى انتوا فيه .. باغيظكوا بس) واسمه مهرجان المسرح الكويتى لما كنت فى الشارقة بقى كمان تفضل الشيخ سلطان القاسمى وهو رجل مثقف وعظيم ويعشق مصر والثقافة والشعر وكمان امر باقامة مهرجان جديد للمسرح الخليجى وابان زيارتى السنة اللى فاتت للشارقة (ابان دى جامدة موت طبعا) قعدت خمستاشر يوم عاصرت فيهم ايه بقى يا مؤمن تلات مهرجانات تانية فى ذات نفس البلد امااارة الشااارقة مهرجان للشعر الشعبى ومهرجان لشعر الفصحى ومهرجان للمسرح المدرسى (يا نهار ابيض) كل دى مهرجانات واهتمام بالثقافة والفنون من كام اسبوع بقى عملوا فى الشارقة مهرجان مسرح الدمى وراح من عندنا تلات فنانين شباب جامدين شاركوا وكان منهم الشاب الموهوب محمد فوزى .. فى كل المهرجانات بقى اللى انا رحتها دول يا مؤمن (مين مؤمن ده مش عارف) كان حوار المسرحيين العرب فى اروقة المهرجانات دى عن حاجة واحدة بس .. هوا وان كويستشن (انجليزى كمان اهو) انتوا لييييه لغيتوا المهرجان التجريبى بتاعكم وصاحت الصديقة الموهوبة مجد القصص من الاردن لغيتوووه ليييه (كان عينا ميهراجااان نلتقى فيه ونتحاور ونفن فى مصر) يعنى بلغوتنا بقى كان عندنا مهرجاااان افتكرتها الاول بتتكلم عن مهرجان فى الاردن طلع لا دى قصدانا احنا بقى وبتتكلم عن التجريبى تحديدا وغيرها وغيرها من الفنانين العرب ،بيتكلموا عن الغاء المهرجان اللى البعض اعتبره رجسسسس من عمل الشيطان ولغوه بعد اتنين وعشرين دورة والاف المطبوعات وسمعة عربية وعالمية وصرخ كل اللى صوته عالى بس الغوووه احرقووووه اقتلوووه بس ايه اقترحوا احقاقا للحق اقتراح جديد نوفى (قال ايه) احنا نعمل بقى مهرجان دولى جديد على نضافة كده (شفت الفتاكة) المهم ان حسرة الفنانين العرب كانت اكبر من حسرتنا واحساسهم بالالتقاء بعيدا عن مصر فاق احساسنا بفقدهم وصارت المهرجانات المسرحية تقام بجدية فى الدول العربية والفنانين العرب يلتقون هناك بعيدا عن مصر ونجح ذو الصوت العالى فى ايقاف ظاهرة ايا كانت عيوبها اللى كانت ممكن تتعالج طبعا وصاح بألمعية يحسد عليها خلاص مابقيناش بلد مهرجانات الحمد لله (شوف الالمعية) انا مبسوط انى حضرت المهرجانات المشرفة دى فى بلادها وحزين على اللى كان بيت للعرب والاجانب وبقى ماضى .. المقالة خلصت (سقف انت وهو .. عبد الحليم حافظ ستايل) لا استنى انت وهو (عبد الحليم برضه) كنت ناوى اسمى المقالة دى (جتها نيلة اللى عايزة بامبينو) يعنى خلف بس ف اخر لحظة سميتها بجملة مجد القصص (كان عينا ميهراجااان) لان الجملة عجبتنى وحزت فى نفسى قوى فخلاص مش هاسميها .. جتها نيلة اللى عايزة خلف.