قصيدة
لو حد يعرف مها
ماهر مهران/ أسيوط
لو حد يعرف مها
يروح يقول لها:
الفارس راحت عليه
ومهران انتهى..
ماعادش الطّلة
اللى بتشوف الضّى
قبل الوجع والطلق..
ولا عاد الجلد
اللى بيقشعر بسرعة
لهموم ووجع الخلق..
ولا عاد العاشق
اللى بـ يفتح عيونه
وقلبه واكله الشوق..
ولا عاد الولهان
اللى بـ ينام منتشى
عشان سمع كلام
صالحه ع الأيام
وروّق له دمّه
وكهرب له قلبه
وطلّعه من الطوق..
ماعادش الخطوة الحنيّنة
اللى بتصلح بينه
وبين أيامه الغبية..
ولاعادت كلمته الكلمة اللى هيّ
ولا قيود الناس خصيمه وعدوه
وخلاص راحت عليه
وخنجره بيصيبه هوّ..
خنجره بيجرحه جوّه..
محبوس صوتى والقضبان ترقوة
ومقيدة يا روحي
وضعيفه يا جناحاتى أضعف من فراشة
ومن طفل يتيم اشتهى..
لو حد يعرف مها
يروح يقول لها:
الأحزان قشّاشة
والشاعر اللى كان مابيبطلش ضحك
بقى عيان بالبكا
والواد اللى كان مابيزهقش من العشق
قلبه شاخ واتكا
على سيرتك اللى عاش بها
وعاش لها
سيرتك اللى عشقها وحبّها..
لو حد يعرف مها
يروح يقول لها:
الورد الدبلان ممكن تنعشه لمسة
والشاعر اللى اتفرم من الأحزان
ممكن ترجعه نظرة عشق لبت من الأرياف..
بت بيضا قلبها فارس
عمره ماضعف ولا خاف..
بت فى عز الشتا فتحت صدرها
وقالت له بأحبك
وضمته بـ لهفة
ولا همها الغل اللى مالى عيون أمم من الأجلاف..
بت بيضا زى جمار النخيل
حلوة زى المانجة الساقعة ع العطش
وقاسية زى كرباج
دار فى الهوا دورات
وبعدين لطش..
بت تقضى ع العطش..
بت تشد كأنها هديل حمام
بت يا سلام لو شفتها
هاتاكلها
أو تبوسها وتحطها فى فاترينة
أو تقطم وتعضعض فى لحمها ..
لو حد يعرف مها
يروح يقول لها:
إنى ماقدرتش جنونها
لمّا كلمتنى بدون سابق معرفة
لما ملكتنى وكانت الشفا
لما جات زارتنى فى بلدى المنسية
وفـ لحظة صفا
قالت لي:
أنا جاية أشوف الشاعر اللى كتب (أبويا)
ولما استقبلتنى وسط زحام قنا
ولما فتحت جناينها
وسقتنى مانجة حلوة
لسه بعد 30 سنة
فى حلقى لذاذة طعمها..
لو حد يعرف مها
يروح يقول لها:
إن صدرى خشْوَل
وجسمى ساب وفشْوَل
وشخت وبوّمت
لدرجة إنى مش عارف
يمين أنا ولا أشول؟
وعينيه يا عينيه دول عينين شاعر
ولّا واحد أحول؟
بيبص على حاجة
وبيشوف عكسها
وبيعشق بت زبدة
ويرهن حياته لواحدة ضدها
ويحلم بأبريق دهب
ويشرب بسطل مخروم
من سطول (قها)..
لو حد يعرف مها
يروح يقول لها:
بـ أضرب نفسى مراكيب
على إنى سبتها
وبـ أخس كل يوم
من التفتيش على ضلها
ومن حفرى لصورتها على جدوع الشجر
و عـ الحيطان
والحجر
لـ حد ماصعبت ع الناس
ولقيتهم فى الشوارع
بيدوروا على صبية
ضيّعها شاعر فقري
الشكل شكلها
والاسم اسمها..
لو حد يعرف مها
يروح يقول لها:
...............…
