الجمهور للفراعنة: لسة الأمانى ممكنة

تحت شعار «لسة الأمانى ممكنة».. حرص العديد من جماهير الكرة المصرية على توجيه رسائل خاصة لمنتخبنا الوطنى الأول لكرة القدم قبل مواجهته المهمة والمصيرية بدور الـ32 لكأس العالم.

سيف محمد قال: «كل أصحابى مرتبين هنتجمع فين من دلوقتى عشان نتفرج سوا على ماتش أستراليا وهو مش فريق يخوف، بس مش سهل اكيد ولو نزلنا ضاغطين عليهم من أول ربع ساعة وخطفنا جون الماتش هيفتح وحاسس إننا هنلعب ماتش كبير وهنكسب 2-0».

أما فريدة يحيى فقالت « أنا ماليش فى خطط الكورة والتفاصيل دى خالص، بس طبعا هتفرج عشان خاطر مصر بس أهم حاجة اللعيبة تنزل مركزة ومحدش يتوتر عشان أستراليا فريق مش سهل أنا سمعت كدة وإن شاء الله محمد صلاح يظبط الدنيا ويجيب جون يفرحنا من أول الماتش ونكسب ونصعد حاسة إنها هتخلص 1-0 لينا».

شريف محمود قال: «الماتشات اللى زى دى بتخلص بالتفاصيل الصغيرة وغلطات المدافعين.. أستراليا بتعتمد على الكرات الثابتة واللعيبة الطوال وده محتاج تركيز كامل من حارس المرمى والدفاع لو عدينا الشوط الأول والشباك نظيفة، الشوط التانى هيبقى بتاعنا. توقعى بقا صعود مصر 1-0 فى الوقت الإضافى».

أحمد عبد الغنى قال «بصراحة الماتش متساوى جداً وكل فريق حظوظه نص ونص.. الميزة عندنا إن اللعيبة بتظهر فى الماتشات الكبيرة اللى زى دي، وشخصية المنتخب بتفرق فى الأدوار الإقصائية. أهم حاجة المدير الفنى يقرأ الماتش صح من الأول، ومنغلطش فى الدفاع. أتوقع هنصعد بضربات الجزاء».

كريم محمود قال: «الماتش مش سهل ومحتاج تركيز كبير من اللعيبة بلاش توتر البدايات اللى بيضيعنا.. أستراليا فريق بيلعب كورة مباشرة على الجول والمرتدات بتاعتهم خطيرة لو قفلنا الأطراف كويس ولعبنا على الهجمات السريعة لصلاح ومصطفى محمد هنعرف نكسب توقعى 2-1 لينا بس الماتش هيشد الأعصاب.»

قال محمد سمير : فاجأ المنتخب الوطنى الجماهير بالمستوى المميز الذى ظهر به، ليس فقط من حيث الأداء والنتائج، ولكن أيضًا بالروح الجماعية الكبيرة بين اللاعبين. فقد بدا واضحًا أن الجميع يلعب من أجل مصلحة الفريق دون البحث عن الظهور الفردي، وهو ما انعكس على الأداء داخل الملعب.. ومع هذا الأداء، ارتفعت طموحات الجماهير المصرية التى تأمل فى استمرار النتائج الإيجابية.