«اتق شر من أحسنت إليه»

هو احنا ازاى بقينا كده.. قلوب متحجرة.. لا فيه شهامة ولا نخوة ولا رجولة.. أخلاق متدنية.. فى الظاهر زعلانين أوى علشان المساجد مغلقة.. وفى الباطن بننكر الجميل  وبنعض الأيد اللى بتتمد لنا.. وبنقتل الناس بكلامنا البارد وسماجة تصرفاتنا.

فى الظاهرأهالى قريتين فى الدقهلية.. وقرية  بالبحيرة.. عاملين خايفين من المرض وفيروس كورونا وبيرفضوا يدفنوا دكتورة توفيت.. وفى الباطن الناس دى بتنتقم من جوزها ومن الدكتورة نفسها لأنهم أغنى.. وربنا رزقهم بفلوس ومناصب ووضع اجتماعى مميز.

فى الظاهرأهالى القريتين متدينين تدينا شكليا.. وفى الباطن بينكروا جميل الدكتورة وجوزها اللى ياما بشهادة بعضهم ساعدوا الناس دى وقدموا لهم مساعدات وبنوا لهم مدارس وعالجوهم وساعدوهم فى تعليم أولادهم ...صحيح اتق شر من أحسنت إليه.!

نكران الجميل  من أهالى القريتين دول..  فكرنى باللى حصل للفنان المرحوم جورج سيدهم.. فى الظاهر جورج سيدهم عاش حياة فى منتهى السعادة.. خفة دم ونجاح وفى الباطن بيتعذب من الخيانة ونكران الجميل .. وأكل دراعه كله.. مش بس عض إيده لمن ساعدهم ووقف إلى جوارهم . فى الظاهر جورج سيدهم كان مصدرا للسعادة والبهجة للجميع.. اللى عايشين معاه واللى يدوب بيعرفوه معرفة سطحية.. وفى الباطن عايش مأساة  أنهت حياته الفنية.. وانتهت بشلل نصف جسمه والبقاء مريضا فى البيت لمدة 22 سنة كاملة.

«جورج سيدهم» كان له شقيق اسمه أمير.. فى الظاهر أمير قلبه على أخيه.. بيدير له كل حياته.. وفى الباطن بيحقد عليه وعلى نجاحه ومنتظر أول فرصة علشان يغدر به .

فى الظاهر أمير كان بيدافع عن مصالح» جورج سيدهم» خاصة بعد ان أصبح مدير الفرقة.. وفى الباطن بيحاول يخليه فاشل.. وبيختلق مشاكل مع سمير غانم وشقيقه الذى يعمل فى الفرقة أيضا.. لحد ما سمير طلب يفك الشراكة مع جورج.

فى الظاهر أمير بينظم حياة جورج وبيساعده وفى الباطن بيسرقه ويستنزفه ومش عايزه يتجوز علشان يفضل مسيطر عليه ويستولى على كل فلوسه.

فى الظاهر أمير كان أسعد شخص بقرار جورج الزواج رغم أنه وصل إلى سن الخمسين بدون زواج.. لكن فى الباطن بيغلى  وغيران من زواج جورج من الدكتورة ليندا والتى ستبدأ بحكم الزواج الاطلاع على كل شىء ومعرفة كل التفاصيل الخاصة بحياة وأموال زوجها فبدأ رسم خطة محكمة للهروب بعد ما يسرق كل حاجة ويخون شقيقه وعشرة عمره .

فى الظاهر أمير كان عايز يريح جورج من كل المشاوير ..فطلب منه يعمل له توكيلا رسميا لإدارة كل شىء والتعامل مع البنوك وتسهيل إدارة مسرح الهوسابير الذى اشتراه جورج .. وفى الباطن دى كانت الخطوة الأخيرة لطعنه فى ظهره وقتله بدم بارد .

فى الظاهر كان أمير ملاكا حارسا لجورج سيدهم إلى جواره طوال الوقت وأكتر واحد بيدعى أنه بيحبه وعايز مصلحته.. وفى الباطن بيخون الأمانة وبينكر الجميل وبيبيع مسرح الهوسابير ويسحب كل أرصدة البنوك ويأخذ قروضا باسم شقيقه بضمان ممتلكاته  مستغلا التوكيل والثقة اللى حطها أخوه الطيب فيه.. بيهرب  أمير خارج مصر ويترك جورج المسكين الوديع يواجه مصيرا مجهولا وتهديدات بالسجن وخراب بيته .

فى الظاهر جورج بدا متماسكا.. لكن فى الباطن عقله لم يستوعب قدر الغدر والخيانة من أقرب الناس له فأصيب بجلطة فى المخ نتج عنها شلل نصف جسده ليظل طريح الفراش بعيدا عن الجميع لمدة 22 سنة كاملة لم يجد فيها أحن عليه من زوجته الدكتورة ليندا التى ظلت بجواره راضية بنصيبها ومقدرة ظروفه الصعبة.

مش قلت لك من الأول :«اتق شر من أحسنت إليه» فى الظاهر هيعمل حبيبك وبيدافع عنك وبيسهل لك حياتك وبيساعدك.. وفى الباطن بيستنزف طاقتك.. وبيسرق نورك وبيحاول يطفيك علشان يعيش هو فى النور.

احذر من اللى فى الظاهر بيوافقك على كل حاجة وبيزين لك الخطأ.. وبيدعى إنه جنبك وبيشيل عنك حتى خطاياك وذنوبك ..وفى الباطن هو شيطان رجيم.