أنا المغنى
روزاليوسف اليومية
ليه كل ما نقول آه
الناس تقول الله
أنا المُغني
ضلوعى زى الشجر
بتفرش الظله
وبتبنى سقف البيت
لما الحيطان تعلى
وروح يا ليل بالسلامة
وهات يا ليل ابتسامة
من الجميل الغايب
هو الحبيب فى الحبايب
هو اللى يعرف ياليل
ليه كل ما نقول آه
الناس تقول الله
أعمل ضلوعى شجر
علشان ترد اللى غاب
وترد قلبه شباب
أعملها سقف وباب
وأعملها مركب
وأفضل ألف البحار
وأغنى فجر ومغرب
وأغنى ليل ونهار
لحد ما تستعجب
ليه كل ما نقول آه
الناس تقول الله
كان فيه شجر موعود
يصبح كمنجة وعود
تسمع فى حسه الودود
ضى النسيم ع الغصن بيتمرجح
ويلاغى ظل الشجر
وسقف بيت فى القمر
وجيران تطل وتفرح
وباب يفتح
لكل غايب يعود
ليه كل ما نقول آه
الناس تقول الله
