«أمى» كلمة السر فى نجاحى

 

كشفت سارة الخولى نجمة كرة اليد بالاهلى عن السر الذى يحفزها دائما لتقديم اداء متميز وتحقيق البطولات.
وقالت سارة فى تصريحات خاصة لـ«روزاليوسف» : امى دائما بتحفزنى وهى اللى لعبتنى كرة اليد زى خالى محمد رفعت.. لعبت من وانا عندى ٧ سنين.. هى اللى كانت دايما تشجعنى هى وبابايا.. كانت دايما تقولى انتى بطله حياتى وهتبقى بطلة فى الهاند بول... وكانت دايما بتشجعنى علشان اكون قدوة لاختى الصغيرة جودى هى بتلعب برده فى النادى الاهلى مواليد ٢٠٠٦.. امى هى اللى عملتنى فى كل حاجة سواء فى الرياضة او فى التعليم او فى حياتى الاجتماعية.. اى حاجة حلوة حصلتلى فى حياتى كانت بسبب دعاها ليا ورضاها عني.. هى عانت معايا كتير بالذات وانا فى السن الصغير كنا بنبقى من المدرسة للتمرين ومن التمرين للدروس.. كانت تقريبا مبتعملش حاجة فى حياتها الا انها كانت معايا ومش سايباني.. ولحد اللحظة دى قبل كل ماتش او بطولة تقعد تدعيلى قبلها بفترة كبيرة اننا نكسب وان ربنا يوفقنى.
اضاف : اهم دعواتها ليا ان ربنا يوفقنى فى كل حاجة فى حياتى فى شغلى فى تمرينى وفى حياتى عموما.. اكتر دعاء بتدعيهولى «يا رب اشوفك احسن واحدة فى كل حاجة ويبعد عنك كل حاجة وحشة ويخليكى ليا ويكرمك ويرزقك بكل اللى بتمنيه ويا رب اشوفك دايما سعيدة ومبسوطة»
تابعت : المواقف اللى وقفت جانبى فيها اصلا مقدرش ان انا احصدها او اعدها بس اللى اقدر اقوله ان اكتر فترة هى تعبت معايا فيها هى فترة ثانوية عامة.. كانت معايا فى كل تفصيلة ان احنا نظبط جدول دروسى مع التمارين وجدول تانى لمذاكرتى وانها تهيألى جو مناسب فى البيت اما ارجع بعدt التعب دة كله انى اذاكر وكانت تقعد تسهر جانبى مبتعملش اى حاجة وانا بذاكر علشان تشجعنى ومنامش.. وكان اهم حاجة عندها انى مقصرش فى مذاكرتى ولا فى تمرينى.. فعلا الفترة دى كانت صعبة قوى عليها والحمد لله ربنا كرمنى بسببها ودخلت هندسة عين شمس وكرمنى برده بسببها واتخرجت منها بسبب وقوفها جانبى ودعاها ليا وفى نفس السنين دى كنا بناخد الدورى الحمد لله وكل بطولاتنا.. لو هتكلم عن مواقف امى معايا مش هيكفينى عمرى كله اتكلم فيه.. امى عملت معادلة صعبة مستحيل حد يعملها..امى عملت المستحيل علشانى انا واخويا واختى.