تعالى يا روح

هو ايه الموضوع بالظبط؟.. شفتوا الدخلة دى؟.. الدخلة دى فيها ايه؟.. فيها ايقاع.. فيها سخونة.. فيها دخول عالموضوع.. فيها إثارة.. فيها رووووووح.. روح تحفزك.. تنفضك من مكانك.. تخليك عايز تفكر.. هو عايز ايه؟ ايه الموضوع؟ ماله مستعجل كده؟ مش يبتدى زى خلق الله بمقدمة طويلة مالهاش لازمة ننام واحنا بنقراها واما نصحى نكمل باقى المقالة.. هو ده سؤالى النهارده .. ألااااا هى راحت فين الروح؟ زمان كنا نسمع عن روح اكتوبر.. روح السد العالى.. روح الاستنزاف.. روح الفانلة الحمرا.. روح الجمهور المصرى.. الروح اللى كانت تفرقنا عن اى شعب واللى كانت تخللى الشعوب العربية تموت ف هوانا.. المصرى اللى ما بيتكسرش .. كنت تسمع عن عرابى.. جمال عبد الناصر.. مصطفى كامل.. طه حسين.. صالح سليم.. وغيرهم وغيرهم من الابطال اللى كان البطل منهم يشاور الكل يعرف سكته سيرتنا مليانة أبطال القلوب كانت متعلقة بيهم.. سيبك انت من الشويتين اللى طلعوا الكام سنة اللى فاتوا بتاع انا ماليش اب وكل الدنيا تبقى موظفين يشتغلوا عندى واديهم بالصرمة لو غلطوا.. طبعا فى جزء مظبوط من الكلام ده وهو ان كل واحد يشوف شغله مظبوط ويتحاسب عليه.. انما كمان فى جزء لئيم مليان قلة احترام  وقلة قيمة وكسر لهيبة الكبير (انا قصدى الكبير الصح مش اى كبير) الجزء  نفسه اللى من كام سنة كان بيرسخ للسخرية من مقولات الرجالة اللى كنت باتكلم عنهم من شوية.. يعنى مافيش مانع تلاقى تريقة على لو لم اكن مصريا لوددت ان اكون مصريا، مافيش فايدة لسعد زغلول.. وكده.. مين بقى اشتغل الكام سنة اللى فاتوا على كسر الروح دى؟.. ديك النهار اتغلبنا ف ماتش كورة ستة واحد (ولو ان الرقم ده بيزعل اصحابى الزملكاوية انما المثل حبك والله) اللعيبة بتلعب زى مايكونوا رايحين المدرسة وهما مش عايزين وامهم تصحيهم الصبح تقول لهم قوم يا واد عندك ماتش، الواد يشد اللح.. على دماغه و يقول خمس دقايق بس يا ماما خمس دقايق.. قوم يا واد ابوك هايسود عيشتنا.. فينتفض اللى يخاف مايختشيش ويجرى يلعب الماتش وهو قالب وشه كأنه بيزكى علينا.. صحيح مافيش كورة بتتلعب من شهور.. صحيح اللعيبة مش ف الفورمة.. صحيح مدربهم لامؤاخذة امريكانى.. بس فين الروح احنا ماكناش اجهز من اسرائيل لما هزمناها ف ٦ اكتوبر.. كان العالم ضدنا واممنا القناة وبنينا السد العالى افتكروا تاريخنا.. العدو لما يعوز يكسرك يكسر روحك الاول يخليك انهزامى.. يخليك تكفر بفكرة القائد.. يتوهك.. فتبقى صيد سهل.. بميت رأى.. يخلق الفرقة ما بينك وما بين ناسك وهو يبقى قاعد ف التكييف وسايبك تاكل ف اهلك.. راحت فين بقى الروح تلاقيها ساعات وانت معدى ف مسرح كده فيه شباب متحمس زى الجامعة والا الهناجر والا الابداع ولا الشباب الطاقة لسه ف عيونهم ومافيش حاجة بتكسرهم  (ده بالنسبة للمسرح باعتبار انى المفروض كنت اكتب عن المسرح) دوروا عالروح هى دى اللى هاتعدى بينا اللى اعدائنا حابين اننا نفضل فيه ..بعد ماتش غانا كتبت، هاروح اشجع منتخب بلدى ف الاستاد ف ماتش العودة ومش هاسيب اللى ياما اسعدونى لوحدهم وهاشجعهم ايا كانت النتيجة.. مش دعوة لتقبل النتيجة ايا كانت، لكن دعوة لضخ الروح ف نفوس لعيبتنا
زمان.. قبل الجمهور الكروى ما يلعب سياسة ويساهم ف دبح روح اللعيبة .. كان الجمهور اللاعب الاتناشر لاى فريق زئيره كان وقود اللعيبة.. معلش انا باتكلم ببساطة ومن ع الوش ومن غير نظريات بس انا مبقوق (حلوة مبقوق دى).. وانا  متأكد ان روحنا فى حد عايز يقتلها.. عايز يكسرنا.. عايز يتوهنا.. عايز يوترنا.. واحنا بنساعده بنسيان تاريخنا وعظمتنا وثقافتنا واخلاقنا واعلامنا وزعمائنا.. افتكر تاريخك وماتخليش حد يكسفك منه ولا يكفرك بيه واللى يحاول يسفه منه او يتريق عليك قول له قديمة  بطلت واتكشفت يا معلم السكة دى روحلهم خليهم يعلموك سكة تانية وتعالى أو خد الباب ف ايدك وماتجيش تانى ..  كسر الروح.. ده اول طريق العدو  بيكسرنا  منه.. يلا انا عايز كلنا ندور على روح مصر العظيمة اللى بنتولد بيها.. يا روح.. يا رووووح انتى فين يا رووووووووح.