خارج الوقت

خارج الوقت..

فاقد الإحساس بالزمن..

بـ أسأل دايمًا:

النهارده إيه؟؟.. الساعة كام؟؟..

بـ استمرار على لسانى:

مش فاهم.. مش عارف.. مش مركز.. مش واخد بالى..

فاضى جدًا.. وفى الحقيقة مشغول لشوشتي..

ومشغول على الآخر.. طول ما أنا فاضي..

نهارى ليل.. وليلى نهار..

بأصحى فى أوقات غريبة.. وأنام فى أوقات أغرب..

تلقانى كده.. نشيط فى منتهى القوة والحماس..

زى ما يكون خلاص.. تقريبًا وصلت وها ألمس حبل النهاية..

وبردة تلقانى.. فى منتهى الضعف والكسل..

زى ما أكون راجع من مشوار بعيد.. من قبل حتى ما أتحرك من مكانى..

محتار أنا.. وحيرتى مرار..

تايه كده دايمًا.. بين أيوه ولأ..

ولا عادت بتفرق معايا.. ولا عدت قادر أفرق..

كتير أهرب من الحقيقة.. ألقانى بأقرب منها..

و كل ما أقرب منها.. ألقانى بهرب عنها..

توهه يا أبا.. والبحر غريق..

توهه يا أبا.. والبحر غريق..

ما أنا أصلى خارج..

خارج الوقت..